Лионел Месси миллиардерга айланди
У бойлиги миллард долларга етган иккинчи футболчи бўлди.
Аргентиналик машҳур футболчи Лионел Мессининг бойлиги 1 миллиард долларга етди. Бу ҳақда «Bloomberg» агентлиги хабар берди.
Мессининг асосий даромад манбалари
Аргентина терма жамоасининг 38 ёшли ҳужумчиси 2007 йилдан бери фақат маош ва бонусларнинг ўзидан 700 миллион доллардан кўпроқ даромад қилган.
Унинг миллиардер мақомига эришишида тижорат шартномалари, телекўрсатувлардан тушган маблағлар ҳамда инвестициялар муҳим рол ўйнаган. Шу тариқа, Месси Криштиану Роналдудан сўнг миллиардерга айланган дунёдаги иккинчи футболчи бўлди.
Лионел Месси 2023 йилдан буён Американинг «Интер Майами» клуби шарафини ҳимоя қилиб келмоқда. Унинг мазкур жамоадаги базавий маоши йилига 25 миллион долларни, кафолатланган умумий даромади эса 28,3 миллион долларни ташкил этади.
Шунингдек, шартномада футболчининг клуб акцияларига эгалик қилиши, шу билан бирга, «Apple» ва «Adidas» компаниялари билан ҳамкорликдан тушадиган фойдадан улуш олиши ҳам кўзда тутилган. Умумий ҳисобда Мессининг йиллик даромади тахминан 130 миллион долларга баҳоланмоқда.
Роналду энг кўп даромад топаётган спортчи бўлиб қолмоқда
Айни пайтда, «Forbes» журнали Саудия Арабистонининг «Ан-Наср» клубида тўп сураётган португалиялик беш карра «Олтин тўп» соҳиби Криштиану Роналдуни дунёнинг энг кўп ҳақ тўланадиган спортчиси деб эътироф этди. Нашр маълумотларига кўра, у сўнгги бир йил ичида 300 миллион доллар ишлаб топган.
Ушбу рейтингда иккинчи ўринни мексикалик профессионал боксчи Канело Алварес (йилига 170 миллион доллар) эгаллаган бўлса, учинчи ўриндан саккиз карра «Олтин тўп» эгаси Лионел Месси (140 миллион доллар) жой олди.
