«Lukoil» асосчиси Леонид Федун компаниядаги улушини тўлиқ сотди
У 1996 йилдан бери «Lukoil» витсе-президенти сифатида ишлаб келган. 2022 йилда Украинада уруш бошлангач, бу лавозимни тарк этган эди. Федун «Lukoil»дан кетишини «пенсия ёши ва оилавий сабаблар» билан изоҳлаган.
«Lukoil» нефт гиганти ҳаммуассиси Леонид Федун компаниядаги улушини тўлиқ сотгани маълум бўлди. Бу ҳақда Reuters агентлиги хабар берди.
Reuters агентлиги Лондон ва Москвадаги учта манбага таяниб, берган маълумотларига кўра, асли украиналик, ҳозирда Монакода истиқомат қилувчи Федун 2025 йил бошида ўзининг тахминан 10 фоизлик улушини корпорациянинг ўзига сотган. Бозор қиймати ҳисобида бу пакет 7 миллиард долларга баҳоланади, аммо амалда бу сумма тадбиркорга тўланганми ёки йўқми ошкор этилмаган.
1990 йиллардаги хусусийлаштириш жараёнларида бойлик орттирган 69 ёшли Федун Россиядаги энг нуфузли бизнесменлардан бири сифатида танилган. У асли ҳарбий мактаб битирувчиси бўлиб, 1980 йилларда Сибирда Вагит Алекперов билан танишган ва СССР парчаланганидан кейин «Lukoil»ни шакллантиришда бирга ишлаган. Алекперов компанияни ички бозорда ривожлантирган бўлса, Федун ташқи ва ички активларни сотиб олиш стратегияларини юритган.
Уларнинг бошқаруви остида «Lukoil» 2000 йиллар давомида глобал энергия бозорининг йирик ўйинчисига айланган эди. 2004 йилда ConocoPhillips компаниянинг катта улушини сотиб олган, бироқ 2010 йилда компания АҚШдаги асосий бизнесга қайтиш мақсадида бу улушдан воз кечган.
Федун бир вақтлар Москвадаги «Спартак» клубининг асосий инвестори сифатида ҳам танилган. Аммо 2022 йилда Россиянинг Украинага ҳужуми ортидан «Lukoil»нинг вице-президентлик лавозимини тарк этаган ва «Спартак»даги улушини сотган.
Reutersга кўра, компаниянинг яна бир асосчиси Вагит Алекперов ҳам 2022 йилда Буюк Британия ва Австралия унга қарши санкциялар киритганидан кейин бош директор лавозимини тарк этган бўлса-да, компания ишларига таъсир ўтказиб келяпти. Федун эса бутунлай сояда қолиб, бизнесдан тўлиқ чекинган.
Эслатиб ўтамиз, 2025 йил октабр ойида АҚШ ва Буюк Британия «Lukoil», «Роснефт» ва уларга қарашли 34 та шуъба компанияга нисбатан янги санкциялар жорий қилган эди. Бу чоралар Россиянинг Украинага қарши давом этаётган уруш ҳаракатлари фонида қабул қилинган. Санкциялардан сўнг «Lukoil» хорижий активларини сотиш бўйича қарор қабул қилди.
Уларни харид қилишга илк даъвогар сифатида Швейцариянинг Gunvor трейдери майдонга чиққан. Бироқ Gunvorʼнинг асосчиларидан бири Россия президенти Владимир Путинга яқинлиги билан танилган Геннадий Тимченко экани сабабли, АҚШ битимга розилик бермади. Вашингтон Украинадаги уруш тугамагунча ушбу компанияга хорижда бизнес юритиш учун лицензия берилмаслигини билдирди. Ундан кейин баъзи хорижий компаниялар ҳам компаниянинг активларига қизиқиш билдирган.
