«Lukoil» хорижий активларини АҚШ компаниясига сотадиган бўлди
Россиянинг «Lukoil» компанияси халқаро активларини сотиш бўйича АҚШнинг «Carlyle» жамғармаси билан шартнома имзолади.
Россиянинг йирик нефт-газ компанияси «Lukoil» ўзининг хориждаги активларига эгалик қилувчи «LUKOIL International GmbH» корхонасини сотиш бўйича АҚШнинг «Carlyle» инвестиция жамғармаси билан келишувга эришди. Компания маълумотига кўра, ушбу битим ноэксклюзив характерга эга бўлиб, бир қатор регулятор талаблари бажарилгандан кейин якунига етиши мумкин.
Келишув шартлари
Имзоланган шартномага мувофиқ, битим АҚШ Молия вазирлигининг Хорижий активларни назорат қилиш бошқармаси (OFAC) томонидан тасдиқланиши лозим. Шунингдек, келишув Қозоғистон ҳудудидаги активларни ўз ичига олмайди. Ушбу лойиҳалар «Lukoil» мулкида қолади ва амалдаги лицензиялар асосида фаолиятини давом эттиради.
Компания шу билан бирга бошқа потенциал харидорлар билан ҳам музокараларни давом эттираётганини маълум қилди. «Reuters» манбаларига кўра, активларни сотиб олишга 10 га яқин инвестор қизиқиш билдирган. Улар орасида «Exxon Mobil», «Chevron», «Carlyle» ҳамда Саудия Арабистонининг «Midad Energy» компанияси бор. «Carlyle» инвестиция жамғармаси ҳозирда 474 млрд долларлик активларни бошқаради ва дунёдаги энг йирик хусусий инвестиция компанияларидан бири ҳисобланади.
Қозоғистон позицияси
Қозоғистон Энергетика вазирлиги «Lukoil»нинг мамлакатдаги активлари бўйича вазиятга муносабат билдирди. Вазир Ерлан Аккенженовнинг айтишича, қонунчиликка кўра, давлатда бундай активларни сотиб олишда устувор ҳуқуқ мавжуд. Унинг таъкидлашича, битим турли молиявий механизмлар, жумладан, кечиктирилган тўлов ёки хомашёдан тушган даромадлар ҳисобига амалга оширилиши мумкин.
Айни пайтда Қозоғистонда бир неча вариант кўриб чиқилмоқда. Аввалроқ маҳаллий ОАВ «КазМунайГаз» миллий компанияси «Lukoil»нинг Қозоғистондаги улушларини сотиб олиш имкониятини ўрганаётгани ҳақида хабар берган эди.
Маълумот учун, «Lukoil» Ўзбекистон, Қозоғистон, Озарбайжон, Ироқ, Нигерия ва бошқа қатор мамлакатларда нефт-газ лойиҳаларида иштирок этади. 2025 йил октябрида АҚШ томонидан жорий этилган санкциялардан сўнг компания хорижий активларини сотиш режаларини эълон қилган.
