«Lukoil»нинг Ўзбекистондаги активларини БАА компанияси сотиб олиши мумкин

Россиянинг «Lukoil» компанияси чет элдаги барча активларини яхлит ҳолда сотишни режалаштирмоқда. Харидорликка қизиқиш билдирганлар орасида Абу-Даби Миллий нефт компанияси (Abu Dhabi National Oil Company, ADNOС) ҳамда АҚШнинг Carlyle, Chevron ва Exxon Мобил компаниялари бор. Бу ҳақда Bloomberg ахборот агентлиги ўз манбаларига асосланиб хабар берди.

Манбаларга кўра, баъзи потенциал харидорлар хорижий активларнинг фақат бир қисмини сотиб олишга қизиқиш билдирмоқда. Жумладан, Chevron ва Exxon «Lukoil»нинг Ироқдаги «Ғарбий Қурна-2» конидаги улушини ўрганмоқда, ADNOS учун эса компаниянинг Ўзбекистондаги активлари энг катта қизиқиш уйғотяпти.

Санкциялар остида қолган «Lukoil»

АҚШ Молия вазирлиги яқинда «Lukoil» ва унинг шуъба тузилмаларини санкциялар рўйхатига киритган эди. Қўшма Штатлар компанияга операцияларни якунлаш учун бир ой муҳлат берди. Бу ҳолат ортидан «Lukoil» ўзининг халқаро активларини сотиш режасини билдирганди.

Аввалроқ Швейцариянинг Gunvor Group трейдери «LUKOIL International GmbH»ни сотиб олиш бўйича таклиф берган, аммо 7 ноябр куни компания бу режадан воз кечганини маълум қилди. Бу қарор АҚШ Молия вазирлиги Gunvor'ни Россия билан алоқалар ҳақида огоҳлантирганидан кейин қабул қилинган.

Аввалроқ Яқинда АҚШ Молия вазирлиги Американинг янги санкциялар пакетига «Lukoil» ва унинг шуъба тузилмаларини киритди. Қўшма Штатлар «Lukoil» ва унинг 50 фоизи ва ундан кўп улушга эга бўлган шуъба корхоналари билан операцияларни якунлаш учун бир ой муҳлат берди. Шундан сўнг, «Lukoil» чеклов чоралари жорий этилиши муносабати билан ўзининг халқаро активларини сотиш ниятида эканлигини маълум қилди.

30 октябр куни «Lukoil» Gunvor group халқаро нефт трейдинг компаниясидан Россия компаниясининг хорижий активларига эгалик қилувчи LUKOIL International GmbH компаниясини сотиб олиш бўйича таклиф олганини эълон қилди. Таъкидлаш жоизки, Швецариянинг Gunvor Group хомашё трейдерига россиялик олигарх Геннадий Тимченко ва унинг швециялик ҳамкори Торберн Тернквист асос солган.

Бироқ, 7 ноябр куни Gunvor ўз таклифини қайтариб олишини маълум қилди. Компания ушбу баёнотни АҚШ Молия вазирлиги унинг Россия билан алоқалари ҳақида хабар берганидан ва Россия-Украина уруши давом этаётган бир пайтда Gunvor бизнес юритиш учун лицензия олмаслиги тўғрисида огоҳлантирганидан сўнг берди.

«Lukoil» 11 мамлакатда, жумладан, Болгария, Руминия ва Нидерландиядаги нефтни қайта ишлаш заводлари, Европадаги АЁҚШ тармоғи, Озарбойжон, Қозоғистон, Ўзбекистон, Ироқ, Миср, БАА, шунингдек, Африка ва Лотин Америкаси мамлакатларидаги нефт қазиб олиш лойиҳалари каби активларга эгалик қилади.