Мадуро 200 млнга кетишни таклиф қилган, Трамп кўнмаган — The Telegraph

The Telegraph нашрининг ёзишича, АҚШ Венесуэла президенти Николас Мадурога нисбатан босимни кескин кучайтирар экан, Вашингтон унинг мансабдан кетишини таъминлаш учун бир қатор қадамларни амалга оширмоқда. Администрация шу мақсадда Мадурони қўлга олишга олиб келадиган маълумот учун мукофот миқдорини 15 млндан 50 млн долларгача оширди. АҚШ Мадурони расман «террорчилик ташкилоти раҳбари» сифатида белгилади ва минтақадаги ҳарбий кўламини ҳам сезиларли равишда кенгайтирди.

Маълумотларга кўра, АҚШ қўшинлари Венесуэла қирғоқларига яқин ҳудудда наркоканалларга алоқадор деб баҳоланган кемаларга зарбалар берди. Бу ҳаракатлар Вашингтоннинг Каракасга нисбатан ёндашуви тубдан ўзгарганини кўрсатмоқда.

Манбаларнинг таъкидлашича, 21 ноябр куни бўлиб ўтган кескин телефон мулоқоти чоғида Доналд Трамп Мадурога ва унинг оиласига Каракасни дарҳол тарк этиш шарти билан хавфсиз чиқиш кафолати таклиф этган. Бироқ бу таклиф қабул қилинмади: Мадуро АҚШдан ўз истефоси эвазига юридик амнистия, 100 дан ортиқ мансабдорга қўйилган санкцияларни бекор қилиш, 200 млн доллар тўлов ва Кубага чиқиш имконини талаб қилди.

Трамп бу шартларни «қабул қилиб бўлмас» дея баҳолаб, рад этди. Шундан сўнг Мадуро Каракаста тарафдорлар олдида намойишкор митинг ўтказиб, саҳнада рақсга тушгани қайд этилган. Бу ҳаракат, таҳлилчилар фикрича, ички аудиторияга қаратилган сиёсий сигнал сифатида талқин қилинмоқда.

АҚШ ва Венесуэла ўртасидаги зиддият кескинлашар экан, экспертлар Вашингтоннинг мақсади Мадурони тан олинмаган президент сифатида халқаро майдондан сиқиб чиқариш ва Каракасда сиёсий транзитни рағбатлантириш эканини таъкидламоқда.