Маҳбусларга айрим кунлари икки соатлик сайрга рухсат берилиши мумкин

Тергов ҳибсхоналарида ушлаб турилган шахсларга дам олиш ва байрам кунларида камида икки соат сайр қилишга рухсат берилиши мумкин. Бу ҳақда Олий Мажлис Қонунчилик палатаси 18 ноябр куни бўлиб ўтган ялпи мажлисда кўриб чиқилган Олий Мажлиснинг Инсон ҳуқуқлари бўйича вакили (омбудсман)нинг «Жиноят ишини юритиш чоғида қамоқда сақлаш тўғрисида»ги Қонунига ўзгартиришлар киритиш тўғрисидаги қонунчилик таклифида айтиб ўтилди.

Омбудсман Феруза Эшматова томонидан киритилган мазкур ташаббус қийин шароитда сақланаётган шахслар кундалик эҳтиёжларини яхшилаш, инсонпарварлик стандартларини мустаҳкамлаш ҳамда халқаро амалиётга мос механизмларни жорий этишни кўзда тутади.

Тақдимотда Омбудсман аппарати ва жамоатчилик гуруҳлари томонидан ўтказилган мониторинглар давомида кўтарилган энг долзарб муаммолар баён қилинди. Хусусан, дам олиш ва байрам кунларида шаффофлик, тоза ҳавода сайр қилиш имконияти ҳамда асосий кийим-кечак ва зарур буюмларни олишдаги чекловлар кўплаб мурожаатларга сабаб бўлгани қайд этилди.

Лойиҳага кўра, ҳибсда сақланаётган шахсларга дам олиш ва байрам кунларида камида икки соат сайр қилиш ҳуқуқини бериш таклиф этилмоқда.

Шунингдек, ойига минимал иш ҳақининг бир баравари миқдорида — 1 миллион 271 минг сўмгача — озиқ-овқат ва энг зарур буюмларни харид қилиш имконияти яратилиши назарда тутилган. Яқин қариндошлари ва бошқа шахслардан кийишга рухсат этилган кийим-бош ва пойабзал олиш ҳуқуқларини беришга оид нормаларни киритиш ҳам таклиф этиляпти.

Қонун лойиҳасини тайёрлаш жараёнида АҚШ, Швеция, Норвегия, Финляндия, Германия, Канада ҳамда қатор МДҲ давлатларининг амалиёти ўрганилгани, миллий қонунчиликни қабул қилинган халқаро мезонлар талабларига уйғунлаштирилиши зарурлиги айтиб ўтилди.

Депутатлар муҳокамасидан сўнг қонунчилик таклифи маъқулланди ва кейинги босқичга ўтказилди.