Markaziy bank bankomatlardagi uzilishlar uchun banklarni jazolaydi
O‘zbekistonda 6-avgustdan boshlab bankomatlar orqali naqd pul yechib olishdagi xizmat ko‘rsatish kamchiliklari uchun banklarga moliyaviy jarimalar qo‘llanishi mumkin.
© kupibilet.ruOliy Majlis Senatining yalpi majlisida Markaziy bankning 2025 yildagi faoliyati to‘g‘risidagi hisoboti эшитилди. Muhokama davomida bankomatlar orqali naqd pul yechib olishda yuzaga kelayotgan texnik muammolar ham ko‘tarildi.
Senatning Mudofaa va xavfsizlik masalalari qo‘mitasi raisi Kutbidin Burxanov ma’lum qilishicha, 2025 yil davomida bankomatlar bilan bog‘liq 290 mingta muammoli holat aniqlangan. Ular orasida bankomat pul bermasligi yoki bank kartasini ushlab qolishi kabi holatlar bo‘lgan.
Uning qayd etishicha, qariyb 10 mingta murojaat 15 kundan ortiq muddatda hal etilgan, 3 mingdan ziyod fuqaro esa muammoni hal qilish uchun ichki ishlar organlariga murojaat qilishga majbur bo‘lgan.
Muammolarning aksariyati banklarga bog‘liq emas
Timur Ishmetov bankomatlar bilan bog‘liq 291 mingta holat yuqori ko‘rsatkich ekanini tan oldi. Biroq u 2025 yilda bankomatlar orqali 341 million operatsiya amalga oshirilganini va muammoli tranzaksiyalar ulushi jami operatsiyalarning 0,08 foizini tashkil etganini ta’kidladi.
Markaziy bank raisi so‘zlariga ko‘ra, qayd etilgan holatlarning 85 foizi banklar faoliyati bilan bevosita bog‘liq emas. Muammolarning bir qismi bankomatda zarur nominaldagi kupyuralar mavjud emasligi, kartaning bloklanishi yoki PIN-kodning noto‘g‘ri kiritilishi bilan izohlanadi.
Shuningdek, aloqa uzilishi va elektr ta’minotidagi muammolar ham sezilarli ulushni tashkil etgan. Bevosita banklar va to‘lov tizimlari operatorlari faoliyatiga esa taxminan 46 mingta holat to‘g‘ri kelgan.
Avgustdan yangi javobgarlik tartibi kuchga kiradi
Timur Ishmetovning bildirishicha, Markaziy bank endi bankomatlar bilan bog‘liq muammolarga faqat texnik nosozlik sifatida emas, balki iste’molchilar huquqlarining ehtimoliy buzilishi nuqtai nazaridan yondashmoqda.
Shu maqsadda banklarga to‘lov infratuzilmasi sifatini oshirish bo‘yicha ko‘rsatmalar berilgan. Shuningdek, regulyator tomonidan tayyorlangan yangi me’yoriy hujjatlardan biri 6-avgustdan kuchga kiradi.
Yangi tartibga muvofiq, bankomatlar va naqd pul yechib olish xizmatlarida mijozlarga xizmat ko‘rsatish bilan bog‘liq qoidabuzarliklar uchun banklarga moliyaviy jarimalar qo‘llanishi mumkin.
