Марко Рубио: «Мадуро — Венесуэланинг нолегитим президенти»

АҚШ давлат котиби Марко Рубио «NBC News» телеканалига берган интервьюсида Николас Мадурони Венесуэланинг нолегитим президенти деб атади. Унинг таъкидлашича, Венесуэла эндиликда Эрон, Россия, Хитой, Куба разведка хизматлари ёки «Ҳизбуллоҳ» каби тузилмалар учун операцияларни мувофиқлаштириш марказига айланмаслиги керак.

Рубионинг сўзларига кўра, Мадурода вазиятни кескинлаштирмаслик учун кўплаб имкониятлар бўлган, аммо у бошқача йўлни танлаган. «У айёроно ўйин қилди ва ютқазди», — деди АҚШ давлат котиби.

АҚШ президенти Доналд Трамп эса Венесуэладаги ўтиш даврида мамлакатни «гуруҳ бўлиб биргаликда» бошқариш нияти борлигини айтди, бироқ мазкур гуруҳ таркибига кимлар киришини аниқлаштирмади. Рубио бу миссия Конгресс розилигини талаб қилмайдиган операция эканини таъкидлади.

АҚШ миллий қонунчилигига кўра, президент Қуролли Кучлар олий Бош қўмондони сифатида Конгресс рухсатисиз қўшинларни хорижда 60 кунгача қўллаш ҳуқуқига эга. Бунда ҳарбий ҳаракатлар бошланганидан кейин 48 соат ичида Конгрессга расмий ҳисобот тақдим этилиши шарт. Шу билан бирга, АҚШ президенти мустақил равишда уруш эълон қила олмайди — бу ваколат фақат Конгрессга тегишли.

Рубио, шунингдек, АҚШга венесуэла нефти керак эмаслигини, аммо Вашингтон Венесуэла нефт саноатининг АҚШ рақиблари қўлида бўлишини қабул қила олмаслигини билдирди.

Бу орада Венесуэла мудофаа вазири Владимир Падрино Лопес «Telesur» телеканали орқали чиқиш қилиб, АҚШ ҳарбийларини Мадурони олиб чиқиш вақтида унинг хавфсизлик хизмати ходимларининг катта қисмини «совуққонлик билан йўқ қилганликда» айблади. Унинг сўзларига кўра, 3 январ куни бўлиб ўтган операция чоғида ҳарбийлар ва тинч аҳоли вакиллари орасида қурбонлар бўлган.