«Mastercard» 1,8 млрд долларга BVNK стейблкоин платформасини сотиб олмоқда
2025-йилда стейблкоинлар орқали тўловлар ҳажми камида 350 млрд долларга етган. «Mastercard» ва унинг рақобатчиси «Visa» тез ўсиб бораётган ушбу сегментда етакчи бўлишга интилмоқда.
«Mastercard» стейблкоин тўловлари учун инфратузилмага ихтисослашган BVNK компаниясини 1,8 млрд долларга сотиб олмоқда. Ушбу келишув «Mastercard»нинг блокчейн орқали пул ўтказмалари соҳасидаги позицияларини мустаҳкамлаши кутилмоқда, дейилади компаниянинг 17-мартдаги баёнотида.
Лидерликка интилиш
Компания қайд этишича, 2025-йилда стейблкоинлар орқали тўловлар ҳажми камида 350 млрд долларга етган, тартибга солишдаги аниқликнинг ортиши эса банклар ва финтех компанияларни токенлаштирилган депозитлар ва блокчейн асосидаги пул ўтказмаларига оид маҳсулотларни ўрганишга рағбатлантирмоқда.
«Reuters»нинг ёзишича, «Mastercard» ва унинг рақобатчиси «Visa» (VN) тез ўсиб бораётган ушбу сегментда етакчи бўлишга интилмоқда. Келишув 300 млн долларлик шартли тўловларни ҳам ўз ичига олади ва уни 2026-йил охирига қадар якунлаш режалаштирилган.
2021-йилда ташкил этилган BVNK фиат валюталарини стейблкоинлар билан боғлайдиган инфратузилмани яратади. Унинг платформаси 130 дан ортиқ мамлакатда барча асосий блокчейн тармоқлари орқали тўловларни юбориш ва қабул қилиш имконини беради.
Ушбу харид фойдаланувчиларга халқаро ўтказмалар, бизнес тўловлари ва тўловларни амалга оширишда рақамли токенлардан фойдаланиш имконини беради.
«Биз вақт ўтиши билан молиявий муассасалар ва финтех компанияларнинг кўпчилиги рақамли валюталар бўйича хизматларни таклиф қилади, деб кутмоқдамиз», – деди «Mastercard»нинг маҳсулотлар бўйича бош директори Йорн Ламберт.
Компания рақамли активлар соҳасидаги иштирокини «Crypto Partner Program» каби ташаббуслар орқали кенгайтиришда давом этмоқда. Бу дастур блокчейн тўловларини «Mastercard»нинг мавжуд тармоғига интеграция қилишга қаратилган.
«Crypto Partner Program» дастури
11-март куни «Mastercard» «Crypto Partner Program» дастури ишга туширилганини эълон қилди. У рақамли активлар ва тўлов технологиялари соҳасидаги 85 дан ортиқ компанияни бирлаштиради. Ташаббуснинг асосий мақсади – глобал савдони қўллаб-қувватловчи мавжуд молиявий инфратузилма билан блокчейнни интеграция қилиш ҳамда рақамли маконда хавфсиз ва мос келувчи тўлов ечимларини яратишдан иборат.