Масъулияти чекланган жамиятлар фаолиятига оид янги қонун кучга кирмоқда

Бугун, 21-апрел куни Адлия вазирлиги томонидан ишлаб чиқилган Янги таҳрирдаги «Масъулияти чекланган жамиятлар тўғрисида»ги қонун давлат раҳбари томонидан имзоланди.

Қайд этилишича, ушбу Қонун билан масъулияти чекланган жамиятлар фаолиятига замонавий корпоратив бошқарув тизими жорий этилмоқда, соҳадаги ҳуқуқий бўшлиқлар бартараф этилмоқда ҳамда жамият иштирокчиларининг ҳуқуқий кафолатлари янада кучайтирилмоқда.

Ушбу Қонун жами 71 та моддадан иборат бўлиб, расмий эълон қилинган кундан эътиборан 3 ой ўтгач кучга кириши белгиланмоқда.

Қонунда бир қатор янгиликлар назарда тутилган. Жумладан:

1) Жамият кузатув кенгашининг ваколатлари ҳамда кенгаши аъзоларини сайлаш тартиби белгиланмоқда. Бу орқали, келгусида келиб чиқиши мумкин бўлган низоли ҳолатларни олдини олиш кўзланган.

2) Жамият кузатув кенгашининг қарорлари сиртдан овоз бериш йўли билан (сўров йўли билан) қабул қилиш тартиби аниқ белгиланмоқда.

3) Қонуннинг яна бир муҳим янгиликлардан бири, бу халқаро корпоратив бошқарув амалиётида мавжуд бўлган жамиятнинг кузатув кенгаши аъзоларининг, яккабошчилик асосидаги ижро этувчи ва коллегиал ижро этувчи органларининг фидуциар мажбуриятлари белгиланганлиги ҳисобланади.

4) Қонун билан жамият нафақат лицензия, балки бошқа рухсат этувчи ҳужжатлар ва хабардор қилиш тартибида фаолият турлари билан шуғулланиши мумкинлиги белгиланмоқда. Бу эса, улар томонидан амалга ошириладиган фаолият турлари сонини оширади.

5) Амалдаги қонунчиликда мавжуд бўлмаган жамиятларнинг филиали ва ваколатхоналарини, шўъба ва қарам хўжаликларини очиш тартиблари алоҳида модда сифатида белгиланмоқда.