«Мелисса» довули 50 млрд долларлик иқтисодий зарар келтирди
Кариб денгизи ҳавзасидаги «Мелисса» довули Ямайка ва Кубани вайрон қилди. 185 миля/соат тезликда ҳаракатланган табиий офат оқибатида камида 50 киши ҳалок бўлган.
28 октабр куни Ямайкага 185 миля/соат (тахминан 295 км/соат) тезликда ёпирилган «Мелисса» довули орол тарихидаги энг кучлиси сифатида қайд этилди. Бу ҳақда Assossiated Press хабар берди.
Миллий довуллар маркази (НҲC) маълумотича, «Мелисса» кейинчалик Кубага 3-хавф тоифасида кириб борди ва 31 октябрга келиб шимолий Атлантикада пост-тропик циклонга айланди.
Ямайкада кучли ёмғирлар ва шамоллар оқибатида катта сув тошқинлари кузатилиб, йўллар, турар-жойлар ва инфратузилмага жиддий зарар етди. Айрим ҳудудлар ташқи дунёдан узилган, электр таъминотида катта узилишлар қайд этилган.
Ҳайитида сув тошқинлари оқибатида кўплаб инсонлар ҳалок бўлди. 1 ноябрь ҳолатига кўра, Кариб ҳавзаси бўйлаб камида 49–50 нафар қурбон ҳақида маълумот берилган.
AccuWeather ва халқаро таҳлил марказлари маълумотича, довул ортидан келган иқтисодий йўқотишлар 48–52 миллиард доллар орасида баҳоланмоқда.
Йўқотишлар асосан уй-жойлар, транспорт тизимлари ва қишлоқ хўжалиги соҳаларига тегишли.
Метеорологлар таъкидлашича, Кариб денгизи сувларининг одатдан юқори ҳарорати довулнинг тез кучайишига сабаб бўлган.
«Мелисса» Атлантика тарихидаги қуруқликка ёпирилган энг кучли 5-хавф тоифасидаги довуллардан бири сифатида қайд этилди.
Ҳозирда қутқарув ишлари ва гуманитар ёрдам кўлами кенгаймоқда. Электр тармоқларини тиклаш ва жабрланган ҳудудларга озиқ-овқат ҳамда дори-дармон етказиш ишлари давом этмоқда.
