Мирзиёев «Марказий Осиё + Япония» саммитида қандай ташаббусларни илгари сурди?

Давлат раҳбари саммитнинг тарихий аҳамиятини таъкидлар экан, Япония ушбу мулоқот форматининг илк ташаббускори бўлганини эслатди ва бугунги учрашув Марказий Осиё билан Япония ўртасидаги ҳамкорликда янги саҳифа очаётганини қайд этди. Унинг айтишича, томонларни қадимий савдо йўллари, ўхшаш анъана ва қадриятлар, шунингдек, узоқ йиллик ишончли алоқалар боғлаб туради.

Президент Мирзиёев Япония мустақилликдан буён Марказий Осиё давлатлари, жумладан Ўзбекистон учун ишончли шерик бўлиб келаётганини алоҳида таъкидлади. Япония инфратузилма, саноат, энергетика, фан ва таълим соҳаларида минтақанинг ривожига муҳим ҳисса қўшаётгани эътироф этилди. Шу боис Марказий Осиё мамлакатлари Япониянинг минтақадаги иштирокини янада кенгайтиришдан манфаатдор экани билдирилди.

Нутқда биринчи муҳим ташаббус сифатида «Марказий Осиё + Япония» саммитларини давлат раҳбарлари даражасида ҳар икки йилда бир марта ўтказиш таклиф қилинди. Кейинги шундай учрашувлардан бирини Ўзбекистонда ташкил этишга тайёрлик билдирилди. Шунингдек, Япония томонидан адлия ва ҳуқуқ соҳасида янги доимий ҳамкорлик механизмини яратиш ташаббуси қўллаб-қувватланди.

Иккинчи йирик таклиф — «Марказий Осиё – Япония 2040» узоқ муддатли ҳамкорлик стратегиясини ишлаб чиқиш бўлди. Ушбу ҳужжат минтақанинг барқарор ривожи ва глобал иқтисодий жараёнларга чуқур интеграциясини таъминлайдиган аниқ дастур ва лойиҳаларни қамраб олиши лозимлиги таъкидланди. Шу билан бирга, етакчи таҳлил марказлари иштирокида Экспертлар форумини таъсис этиш ва унинг илк йиғилишини Тошкентда ўтказиш таклиф этилди.

Президент савдо-иқтисодий ва инвестициявий ҳамкорликни кенгайтиришга алоҳида эътибор қаратди. Марказий Осиё инфратузилмаси ва саноатини ривожлантириш учун Япония инвестициялари ва технологияларини жалб этадиган махсус инвестиция жамғармасини ташкил этиш ғояси илгари сурилди. Шунингдек, Япония технопаркларининг минтақавий тармоғини яратиш орқали саноат кооперацияси ва технологиялар трансферини кучайтириш таклиф қилинди.

Рақамли трансформация масаласида Мирзиёев Япония компанияларининг робототехника, автоматлаштириш ва сунъий интеллект соҳаларидаги етакчи тажрибасини қайд этди ҳамда «Марказий Осиё – Япония» рақамли хаби ташкил этиш ташаббусини билдирди. Транспорт ва логистика йўналишида эса тезюрар поездлар, автомобиль йўллари, аэропортлар ва логистика марказларини барпо этишда япон технологияларини кенг қўллаш истаги билдирилди.

Энергетика ва экология масалаларида Ўзбекистон 2035 йилгача зарарли газлар чиқиндисини 50 фоизга қисқартириш, 2030 йилгача «яшил» энергия улушини 54 фоизга етказиш мақсадини маълум қилди. Шу доирада Япония билан қайта тикланадиган энергетика, сейсмик хавфсизлик, таълим ва ёшлар алмашувини кенгайтириш бўйича қўшма дастурлар таклиф этилди.

Президент нутқининг якунида глобал беқарорлик шароитида тинчлик ва барқарорликни мустаҳкамлаш, шунингдек, Афғонистонни минтақавий иқтисодий жараёнларга жалб этишда Япония билан ҳамкорликни давом эттириш муҳимлиги қайд этилди.