MobiUz 351 млн долларга сотилди
MobiUz мобил операторининг 100 фоиз давлат улушини хусусийлаштириш жараёни якунланди. Ғолиб таклиф АҚШнинг McKim and Company компанияси бошчилигидаги консорциум томонидан берилди ва компания 351 млн долларга баҳоланди.
© Spot
Давлат активлари агентлиги «Universal Mobile Systems» МЧЖ (MobiUz) устав капиталидаги 100 фоиз давлат улушини сотиш бўйича халқаро очиқ савдо жараёнлари якунланганини маълум қилди.
Хусусийлаштириш жараёнида халқаро консультантлар жалб этилди. Хусусан, «Rothschild & Co» стратегик консультант, «KPMG» молиявий консультант ва «Deloitte» мустақил баҳоловчи сифатида иштирок этди.
Савдо жараёнлари халқаро бозорларда фаол тарғиб қилинди. Консультантлар орқали 100 дан ортиқ стратегик ва молиявий инвесторлар билан музокаралар ўтказилди. Шунингдек, битим ҳақидаги маълумотлар Bloomberg ва Financial Times каби халқаро нашрларда ёритилди ҳамда инвесторлар учун махсус роуд-шоулар ташкил этилди.
«Натижада АҚШ, Япония, Форс кўрфази давлатлари, Европа ва Кавказорти минтақаларидан 15 дан ортиқ инвестор жараёнда қатнашди. Уларнинг 10 нафари дастлабки нарх таклифларини тақдим этган бўлса, 6 нафар иштирокчи MobiUz'ни сотиб олиш бўйича мажбурият юкловчи қатъий таклиф берди», дейилади хабарда.
Якуний босқичда энг яхши таклиф АҚШнинг «McKim and Company» компанияси бошчилигидаги молиявий инвесторлар ва технологик ҳамкор «JVR Enterprises LLC» («JVR Capital Group») иштирокидаги консорциум томонидан билдирилган.
Таклифга кўра, MobiUz компаниясининг қиймати 351 млн доллар этиб баҳоланган. Шу билан бирга, инвесторлар телекоммуникация инфратузилмасини ривожлантириш учун 500 млн долларгача қўшимча инвестиция киритишни режалаштирмоқда.
Давлат активлари агентлиги маълум қилишича, битимнинг EV/EBITDA мультипликатори 7,4 баробарни ташкил этган.
Битимнинг кучга кириши учун эндиликда тегишли тартибга солувчи органлар рухсатлари олиниши ҳамда белгиланган корпоратив ва ҳуқуқий тартиб-таомиллар бажарилиши лозим.
Хусусийлаштириш жараёни
Universal Mobile Systems (Mobiuz) ни хусусийлаштириш бўйича қарор 2022 йилги давлат дастури асосида қабул қилинган эди. 2025 йил апрель ойида эса бу қарор янги фармон билан расман кучга кириб, 10 июль санасида 100 фоизлик давлат улуши сотувга қўйилганди.
Дастлабки босқичда 15 та халқаро ва миллий компания қизиқиш билдирган. Ноябрь ойида эса агентлик Mobiuz'ни сотиб олиш учун финал босқичида 10 та компания рақобатлашишини маълум қилган.
Эслатиб ўтамиз, 2025 йил якунлари бўйича Universal Mobile Systems 173,6 млрд сўмлик соф фойда кўрган.