НАТО ўз хатосини англаб етди
Алянснинг собиқ бош котиби Йенс Столтенберг 2014 йилда йўл қўйилган «энг катта хато» ҳақида очиқ гапирди.
НАТО Украинани 2014 йилдан бошлаб қуроллантирмасдан хато қилган. Бу ҳақда алянснинг собиқ бош котиби Йенс Столтенберг бугун, 16 феврал куни Мюнхен хавфсизлик конференцияси доирасида DW телеканалига берган интервюсида маълум қилди.
Кечиккан ёрдам ва стратегик хато
«НАТО иттифоқчилари Украинага мисли кўрилмаган даражада ёрдам кўрсатишди. Бироқ энг катта хато — кўпроқ ёрдамни эртароқ тақдим этмаганимизда бўлди. Биз буни 2014 йилдаёқ бошлашимиз керак эди.
Агар биз ўшанда шундай қилганимизда, менимча, украиналиклар ҳозирги кунда ўз ҳудудларининг кўпроқ қисмини назорат қилаётган бўлишарди. Балки 2014 йилдан 2022 йилгача бўлган вақт оралиғида уларни қуроллантириб, ўқитганимизда, Россия билан урушнинг олдини олиш ҳам мумкин бўларди», — деди Столтенберг.
«Қизил чизиқлар»ни бекор қилиш чақириғи
Кеча Дания бош вазири Метте Фредериксен ҳам Украинага қурол етказиб бериш масаласидаги «қизил чизиқлар»ни бекор қилишга чақирди.
Фредериксеннинг таъкидлашича, Россия Европа билан тинчлик ўрнатишни хоҳламайди. У фақат куч тилини тушунади ва чекловлар мавжуд бўлган шароитда урушда ғалаба қозониб бўлмайди.
«Ҳозир ҳам Украинада қандай қуроллардан фойдаланиш мумкинлиги борасида "қизил чизиқлар" сақланиб қолмоқда. Бу борадаги муҳокамаларимиз қарийб тўрт йилдан бери давом этяпти. Шунчаки қуролни орқалаб юриш билан урушда ютиб бўлмайди. Менимча, биз Украинага нима керак бўлса, барчасини беришимиз лозим.
Биз тарихни қайта ёза олмаймиз, лекин бир неча йил олдин Украинага НАТО аъзолигини берганимизда эди, биз ҳозир бу муаммони ҳал қилган бўлар эдик», — дея қўшимча қилди Дания ҳукумати раҳбари.
