НАТО раҳбари Путиннинг ядровий таҳдидлари устидан кулди
Марк Рютте Путиннинг сўнгги ядровий баёнотларини жиддий қабул қилмаслигини айтиб, унинг чиқишларига эътибор қаратмаслигини очиқ билдирди.
НАТОнинг янги бош котиби Марк Рютте Россия президенти Владимир Путиннинг ядровий таҳдидларига муносабат билдириб, у ҳақда жиддий ўйламаслигини очиқ айтди. Бу ҳақда Румунияда бўлиб ўтган учрашув пайтида маълум қилинди. Digi24 нашрининг ёзишича, Рютте журналистлар саволига жавоб берар экан, Путиннинг сўзларини жиддий қабул қилмаслигини билдириб, шунчаки кулиб жавоб қайтарган.
«Мен Путин ташкил қиладиган учрашувларга аллақачон реакция билдиришдан тўхтаганман. Унга президентлик маоши тўланади, шу сабаб у шундай учрашувлар ўтказади», — деди НАТО бош котиби.
Бу баёнот Путиннинг 5 ноябрда Россия Хавфсизлик кенгашида айтган сўзларига жавоб сифатида янгради. Унда Путин Россия «кенг кўламли ядровий синовларга» тайёргарликни бошлаши мумкинлигини билдирган эди. Шунингдек, Россия мудофаа вазири Андрей Белоусов АҚШ октябрдаги Global Thunder машғулотлари вақтида Россия ҳудудига нисбатан ядровий зарбаларни машқ қилганини даъво қилди.
Айни пайтда, АҚШ президенти Доналд Трамп ҳам ядровий синовлар ўтказиш нияти борлигини билдирган. Унинг айтишича, «бошқа давлатлар буни қилаётган экан, АҚШ ҳам шундай қилишга ҳақли». Шу муносабат билан АҚШ армияси 5 ноябр куни Minuteman III қитъалараро баллистик ракета синовини амалга оширди.
