Навоийда 15,5 млрд сўмлик тендерда қонунбузилиши аниқланди

Рақобат қўмитасининг Навоий вилояти ҳудудий бошқармаси томонидан «Ҳудудий электр тармоқлари» АЖ Навоий ҳудудий филиали ўтказган энг яхши таклифларни танлаш бўйича тендер савдолари қонунчиликка мувофиқлиги юзасидан ўрганилди.

Текширув ишлари «FERGANA AVTOMAT RASCHOT» МЧЖнинг мурожаати асосида амалга оширилди ва танловнинг умумий қиймати 15,5 млрд сўмдан ортиқ экани қайд этилди.

Текширувда аниқланган ҳолатлар

Ўрганиш натижаларига кўра, буюртмачи томонидан ташкил этилган танлов савдоларида «Рақобат тўғрисида»ги қонуннинг 29-моддаси талабларига риоя этилмаган. Хусусан, тендер шартларига иштирокчилар учун рақобатни чеклайдиган талаблар киритилгани маълум бўлди. Шунингдек, танлов ҳужжатларида белгиланган мезонлар асосида таклифлар тўлиқ ва холис баҳоланмагани ҳамда айрим ҳолатларда таклифларни нотўғри баҳолаш амалиёти қўлланилгани аниқланди.

Бу ҳолатлар тендер жараёнида соғлом рақобат муҳитига путур етказиб, иштирокчиларнинг тенг ҳуқуқли иштирокига салбий таъсир кўрсатган. Қўмита мутахассислари ушбу камчиликлар танлов натижаларининг шаффофлиги ва адолатлилигини шубҳа остига қўйишини таъкидлади.

Қўлланилган чоралар

Аниқланган қонунбузилишлар асосида ҳудудий бошқарманинг махсус комиссияси томонидан буюртмачи ташкилотга нисбатан иш қўзғатилди. Ишни кўриб чиқиш якунлари бўйича молиявий жарима қўллаш ҳақида қарор қабул қилинди.

Бундан ташқари, буюртмачи ташкилотнинг мансабдор шахсига нисбатан маъмурий баённома расмийлаштирилиб, белгиланган тартибда суд органларига юборилди. Қонунбузилишларни бартараф этиш ҳамда келгусида бундай ҳолатларнинг олдини олиш мақсадида ташкилотга бажарилиши мажбурий бўлган кўрсатма берилди.

Эслатиб ўтамиз, аввалроқ Рақобат қўмитаси ҳудудларда 4,3 млрд сўмдан ортиқ давлат харидларида қонунбузарлик ҳолатларини аниқлаб, тегишли чоралар кўргани ҳақида хабар берилганди.