Нефт арзонлашмоқда: АҚШ ва иттифоқчилари Ҳўрмуз бўғозини блокдан чиқариш учун кучларни бирлаштирмоқда
Вашингтон Эрон нефтига қўйилган санкцияларни бекор қилиш ва АҚШнинг стратегик нефт захираларидан қўшимча нефт чиқаришни режалаштирмоқда.
Жаҳон нефт нархлари бугун, 20-март куни пасайди. Бу Европа етакчи давлатлари ва Япониянинг Ҳўрмуз бўғозида кемалар хавфсизлигини таъминлашга қўшилишга тайёрлиги фонида юз берди. Шу билан бирга, АҚШ бозорда таклифни оширишга қаратилган бир қатор чораларни эълон қилди. Бу ҳақда «Reuters» хабар берди.
Бозор динамикаси
Жума эрталабги ҳолатга кўра, нефтнинг асосий эталон навлари қуйидагича пасайди:
«Brent» фючерслари 1,36 доллар (1,3 фоиз) га тушиб, баррели 107,29 долларни ташкил қилди.
Американинг «WTI» нефти 1,92 доллар (2 фоиз)га арзонлашиб, 94,22 долларга етди.
Шунга қарамай, ҳафта якунига кўра «Brent» 4 фоиз ўсиш билан ёпилиши кутилмоқда. Бу Форс кўрфази мамлакатларидаги нефт-газ объектларига яқинда қилинган зарбалар билан боғлиқ. «WTI» эса аксинча, сўнгги бир ой ичида илк бор ҳафталик пасайишни (4 фоиздан ортиқ) қайд этади.
АҚШ ва иттифоқчиларининг стратегик қадамлари
АҚШ молия вазири Скотт Бессент нархларни пасайтириш учун икки асосий инструментдан фойдаланиш режалаштирилаётганини билдирди:
танкерларда блокланган Эрон нефтига қўйилган санкцияларни бекор қилиш;
АҚШнинг стратегик нефт захираларидан қўшимча нефт чиқариш имконияти.
Бозор учун муҳим сигнал сифатида Буюк Британия, Франция, Германия, Италия, Нидерландия ва Япониянинг қўшма баёноти эълон қилинди. Улар Хўрмуз бўғози орқали танкерлар хавфсиз ўтишига ёрдам беришга тайёр эканини билдиришди. Ушбу йўлак орқали жаҳон нефти ва суюлтирилган табиий гази экспортининг тахминан 20 фоизи ўтади.
Шунингдек, Доналд Трамп Бинямин Нетаняхуни Эрон энергетика инфратузилмасига такрорий зарбалардан тийилишга чақирганини маълум қилди.
Ички ресурслар: АҚШда ишлаб чиқариш ўсмоқда
Нархларга босим ўтказган яна бир омил – АҚШнинг Шимолий Дакота штатида нефт қазиб олиш ҳажми ошиши ҳақидаги хабарлар бўлди. Регуляторлар бу ойнинг ўзидаёқ ишлаб чиқариш ўсишини кутмоқда. Бу, асосан, фаол бўлмаган қудуқларни қайта ишга тушириш ва қишки чекловларнинг юмшатилиши билан изоҳланмоқда. Бироқ ўсиш суръати нефт нархлари йирик компаниялар учун етарлича юқори бўлишига боғлиқ бўлади.
Аналитиклар фикри
«Phillip Nova» компаниясининг катта таҳлилчиси Приянка Сачдевага кўра, жаҳон етакчилари вазиятни юмшатиш ҳақида гапира бошлаганидан сўнг бозор «ҳарбий премия»ни қисқартиришни бошлади.
«Зарар аллақачон етказилган. Ҳатто Ҳўрмуз бўғози орқали хавфсиз ҳаракат бўйича келишувга эришилса ҳам, логистикани тўлиқ тиклаш жуда кўп вақт олади. Инфратузилмага ҳар қандай янги тўғридан тўғри зарба нархларни яна кескин ошириши мумкин», – деди у.
