ОАВ: Европа етакчилари Зеленскийни АҚШнинг эҳтимолий «хиёнати» ҳақида огоҳлантирди
Улар Вашингтон эҳтимолий равишда ҳудудлар бўйича келишувга босим ўтказиши, бироқ Киевга аниқ хавфсизлик кафолатлари бермаслигини таъкидлаб, Зеленскийни эҳтиёткорликка чақирди.
Европа мамлакатлари раҳбарлари Украина атрофидаги музокара жараёнлари кескинлашган бир пайтда президент Володимир Зеленскийга жиддий огоҳлантиришлар бермоқда. Der Spiegel’нинг маълумотига кўра, Франция президенти Эммануэл Макрон АҚШ ҳудудлар масаласига аралашиши мумкинлигини, бироқ бу Киев учун ишончли кафолатлар билан таъминланмаслигини айтган.
Унга қўшимча равишда, Германия канцлери Фридрих Мерц Вашингтон Украина бўйича «ўз ўйинларини ўйнаётгани»ни таъкидлаган. Унинг фикрича, АҚШда айрим доиралар тинчлик музокараларини тезлаштиришга қизиқмоқда, аммо бу Киев манфаатларига зид сценарийларга олиб келиши мумкин.
Европа етакчиларининг яна бир ташвиши – Украина президентининг АҚШнинг норасмий музокарачилари билан учрашувлари. Финляндия президенти Александр Стубб Зеленскийни Жаред Кушнер ва Стив Уиткофф каби шахслар билан ёлғиз қолмасликка чақирган. Унинг сўзларига кўра, бундай мулоқотларда Европа ҳам иштирок этиши лозим, акс ҳолда Вашингтон манфаатлари устун келиб қолиши эҳтимоли юқори.
NATO Бош котиби Марк Рютте ҳам ушбу фикрларни қўллаб-қувватлаган. У Европа учун Украина хавфсизлигини таъминлаш устувор аҳамиятга эга эканини таъкидлаб, минтақада ҳар қандай келишув Киев позициясига таянилган ҳолда қабул қилиниши зарурлигини айтган.
Der Spiegel мақоласида қайд этилишича, Европа раҳбарлари АҚШдаги айрим сиёсий кучлар Украинага босим ўтказиши мумкинлигини олдиндан сезмоқда. Шу боис Зеленскийга эҳтиёткорлик, ҳамкорларнинг кенг иштироки ва ҳар бир музокара босқичида умумий ЕИ манфаатларини инобатга олиш тавсия қилинган.
