Олимлар инсон жисмоний ҳолатининг энг юқори чўққисини аниқлади
Кўп йиллик илмий кузатувларга кўра, инсон жисмоний имкониятлари маълум бир ёшда энг юқори чўққига чиқади, кейин эса аста-секин пасайишни бошлайди.
Инсоннинг жисмоний имкониятлари — чидамлилик, куч ва мушак фаоллиги тахминан 35 ёшга келиб максимал даражага етади. Шундан сўнг улар босқичма-босқич пасая бошлайди. Бундай хулосага олимлар кўп йиллик комплекс тадқиқот натижалари асосида келди, деб ёзмоқда Independent.
Тадқиқотга кўра, 35 ёшдан кейин машғулот даражасидан қатъи назар, жисмоний кўрсаткичлар пасайиши кузатилади. Ёш ўтиши билан бу жараён тезлашиб, келажакда инсоннинг мустақил ҳаёт кечириш қобилиятига ҳам салбий таъсир кўрсатиши мумкин. Илгари бундай хулосалар алоҳида ёш гуруҳларини қамраб олган парчаланган тадқиқотларга асосланган эди.
Янги тадқиқот Швецияда ўтказилган бўлиб, ўзининг 47 йил давом этганлиги билан ажралиб туради. Олимлар 1958 йилда туғилган 400 нафардан ортиқ эркак ва аёлни 16 ёшдан 63 ёшгача кузатиб боришган. Бу даврда иштирокчиларнинг жисмоний ҳолати ва куч кўрсаткичлари мунтазам баҳоланган.
Натижалар шуни кўрсатдики, 63 ёшга келиб инсоннинг умумий жисмоний салоҳияти ўртача 30–48 фоизга пасаяди. Қизиғи шундаки, бу кўрсаткичлар эркаклар ва аёллар ўртасида деярли фарқ қилмаган. Олимлар бу ҳолатни табиий физиологик жараён сифатида баҳоламоқда.
Шу билан бирга, тадқиқот жисмоний фаолликнинг ҳар қандай ёшда фойда беришини ҳам тасдиқлади. Катта ёшда ҳаракатли ҳаёт тарзини бошлаган иштирокчилар ўз кўрсаткичларини 5–10 фоизга яхшилай олган.
Тадқиқот етакчи муаллифи Мария Вестерстолнинг таъкидлашича, жисмоний фаоллик пасайиш жараёнини тўлиқ тўхтатмаса-да, уни сезиларли даражада секинлаштириши мумкин.
Олимлар келгусида ҳам кузатувларни давом эттириб, ёшга боғлиқ ўзгаришлар механизмларини янада чуқурроқ ўрганишни режалаштирмоқда.
