Олтин нархи кескин тушиб, 6 фоизга арзонлашди

Ню Йорк товар биржаси (COMEX) маълумотларига кўра, 21 октябр савдоларида олтин нархи 6 фоизга пасайиб, бир трой унсияси учун 4100 долларни ташкил этди. Бу 2013 йилдан буён кузатилган энг катта бир кунлик пасайишдир, деб маълумот бермоқда РБК нашри.

Кумуш нархи ҳам арзонлашди, «Newmont» каби йирик кон компаниялари акциялари кескин тушди. Bloomberg агентлиги ёзишича, бу ҳолат асосан инвесторларнинг фойда олиш мақсадида олтин сотиши билан боғлиқ.

Тошкент вақти билан соат 19:45 да пасайиш суръати 6,12 фоизга етди, котировкалар минимал 4093 долларни кўрсатди. Аналитиклар фикрича, АҚШ долларининг сўнгги ҳафталардаги мустаҳкамланиши ҳам олтин нархига босим ўтказган.

«MKS Pamp» компанияси таҳлилчиси Никки Шилснинг таъкидлашича, нархлар ҳаддан ташқари тез ўсгани вазиятни мураккаблаштирган: «Олтин олти ҳафта ичида 1000 долларга қимматлади — бу ортиқча харид ҳолатини кўрсатади, биз ҳозир ‘стратофера’ босқичида турибмиз», деди у.

Шунингдек, 16 октябр куни олтин нархи тарихда илк бор бир унсия учун 4300 доллардан ошган, 20 октябрда эса 4398 долларгача кўтарилган эди. Кумуш нархи ҳам рекорд даражаларни янгилади.

Аввалроқ АҚШ ва Хитой муносабатларидаги кескинлик ҳамда Федерал зaxира тизимининг сиёсатни юмшатишига оид кутилмалар натижасида августдан бери олтин ва кумуш нархлари рекорд даражада ўсиб келаётган эди.