Ўзбек дипломати Австралия генерал-губернаторига ишонч ёрлиқлари топширди
Расмий маросим Канберра шаҳрининг «Government House» резиденциясида бўлиб ўтди.
Ўзбекистоннинг қароргоҳи Сингапур шаҳрида жойлашган Австралиядаги элчиси Алишер Қаюмов Канберрадаги Government House резиденциясида Австралия Генерал-губернатори Саманта Мостинга ишонч ёрлиқларини топширди. Бу ҳақда «Дунё» ахборот агентлиги хабар берди.
Қайд этилишича, Австралия Генерал-губернатори билан суҳбат давомида сўнгги йилларда тобора ривожланиб бораётган Ўзбекистон–Австралия муносабатларининг бугунги ҳолати ва истиқболлари, жумладан сиёсий, савдо-иқтисодий, илм-фан, таълим ва бошқа соҳалардаги ҳамкорлик масалалари батафсил муҳокама қилинган.
Саманта Мостин Ўзбекистон Президенти Шавкат Мирзиёев раҳбарлигида амалга оширилаётган кенг кўламли ислоҳотларни юқори баҳолаб, давлат бошқаруви тизимини модернизация қилиш, фуқаролик жамиятини ривожлантириш ва халқаро бизнес учун қулай инвестиция муҳитини яратиш борасида эришилган натижаларни алоҳида қайд этган.
Австралия ва Ўзбекистoн иқтисoдиёти ўртасидаги ўxшашликлар, хусусан, паxтачилик ва тoғ-кoн санoати сoҳалари муҳим рoл ўйнаши қайд этилиб, бу иннoвация ва инвестициялар йўналишларида ўзарo ҳамкoрлик учун кенг истиқбoлларни яратиши таъкидланган.
Шунингдек, Генерал-губернатор яқинда Самарқандда бўлиб ўтган ЮНЕСКО бош конференцияси муваффақиятли ўтказилганини таъкидлаб, австралиялик туристлар учун Ўзбекистон тобора жозибадор йўналишга айланаётганини билдирган.
Суҳбат якунида Саманта Мостин икки томонлама муносабатларни янада мустаҳкамлашга тайёрлигини билдириб, Ўзбекистон раҳбарияти ва халқига самимий тилакларини етказган.
Эслатиб ўтамиз, Алишер Қаюмов Ўзбекистоннинг Сингапурдаги (2018–2024) ва Австралияда (2022–2024) ўриндошлик асосидаги элчиси (қароргоҳи Сингапурда) бўлиб ишлаган Қаҳрамон Шокиров ўрнига тайинланган. 2024 йил 30 апрел куни Алишер Қаюмов Сингапур Президенти Тарман Шанмугаратнамга ишонч ёрлиқларини топширган эди.
