O‘zbekiston to‘qimachilik mahsulotlari eksportini 26,9 foizga oshirdi
Chetga sotilgan mahsulotlar orasida tayyor to‘qimachilik mahsulotlari eng katta ulushga ega bo‘ldi. Ular umumiy eksportning 51 foizini tashkil etdi.
© Messe Frankfurt2026-yilning yanvar–avgust oylarida O‘zbekiston 2,1 mlrd dollarlik to‘qimachilik mahsulotlarini eksport qildi. Bu o‘tgan yilning shu davriga nisbatan 26,9 foizga ko‘p. Bu haqda Milliy statistika qo‘mitasi ma’lumot berdi.
To‘qimachilik mahsulotlari mamlakat umumiy eksportining 9,4 foizini tashkil etdi.
Hisob-kitoblarga ko‘ra, joriy yilning dastlabki sakkiz oyida to‘qimachilik mahsulotlari eksporti qiymati 2025-yilning shu davriga nisbatan qariyb 445 mln dollarga oshgan. O‘tgan yilning yanvar–avgust oylarida eksport hajmi taxminan 1,65 mlrd dollarni tashkil etgan.
Eksport qilingan mahsulotlar orasida tayyor to‘qimachilik mahsulotlari eng katta ulushga ega bo‘ldi. Ular umumiy eksportning 51 foizini tashkil etdi. Ikkinchi o‘rinda 32 foiz ulush bilan ip-kalava turibdi.
Qolgan mahsulotlar ulushi quyidagicha taqsimlangan:
— tayyor to‘qimachilik mahsulotlari — 51 foiz;
— ip-kalava — 32 foiz;
— trikotaj mato — 8 foiz;
— gazlama — 6 foiz;
— chulki-paypoq mahsulotlari — 2 foiz;
— gilamlar — 1 foiz.
Ushbu ulushlardan kelib chiqib hisoblanganda, 2026-yilning dastlabki sakkiz oyida tayyor to‘qimachilik mahsulotlari eksportidan taxminan 1,07 mlrd dollar, ip-kalava eksportidan esa 672 mln dollar tushum olingan. Trikotaj mato eksporti qariyb 168 mln dollar, gazlama eksporti 126 mln dollar, chulki-paypoq mahsulotlari eksporti 42 mln dollar va gilamlar eksporti 21 mln dollarga teng bo‘lgan.
Tayyor to‘qimachilik mahsulotlari va ip-kalava birgalikda umumiy eksportning 83 foizini tashkil etgan. Bu ikki turdagi mahsulot eksportidan jami taxminan 1,74 mlrd dollar tushum olingan.
Ma’lumotlar O‘zbekiston to‘qimachilik sanoati mamlakat eksport daromadlarida muhim o‘rin tutishini ko‘rsatadi. Yil davomida eksport qiymatining oshishi esa sohadagi tashqi savdo tushumlari o‘tgan yilga nisbatan ko‘payganini anglatadi.
Eslatib o‘tamiz, avvalroq o‘zbek to‘qimachiligi uchun yangi bozor bo‘lmish AQSHga eksport yo‘lida qanday imkoniyat va to‘siqlar borligi haqida yozgan edik.
