Ўзбекистон Туркий жамғарма доирасида инвестиция портфелини шакллантиради

2 май куни Ўзбекистон Республикаси инвестициялар, саноат ва савдо вазири Лазиз Қудратов Туркий инвестиция жамғармаси президенти Бағдод Амреев билан учрашув ўтказди.

Музокараларда жамғарманинг жорий ҳолати, операцион фаолиятини йўлга қўйиш ва институционал шакллантиришга доир навбатдаги чоралар кўриб чиқилган.

Инвестиция йўналишлари кенгаймоқда

Ўзбекистон томони Туркий инвестиция жамғармасининг амалий иш босқичига ўтишини олқишлаб, ушбу тузилманинг туркий дунёдаги истиқболли инвестиция салоҳиятига эга илк қўшма молиявий институт сифатидаги ўрнини алоҳида таъкидлаган.

«Учрашувда Ўзбекистоннинг Жамғарма фаолиятида фаол иштирок этишга, жумладан, саноат, инфратузилма, транспорт, қишлоқ хўжалиги, рақамли технологиялар ва бошқа соҳаларда инвестиция лойиҳалари портфелини шакллантиришга бўлган қизиқиши қайд этилди», —дейилади хабарда.

Қўшма молиялаштириш ва янги лойиҳалар

Шунингдек, халқаро молия институтлари ва хусусий инвесторлар иштирокида қўшма молиялаштириш механизмларини жорий этиш масалалари кўриб чиқилган.

Музокаралар якунида томонлар аниқ лойиҳалар портфелини шакллантириш бўйича келишувга эришган.

Шу билан бирга, тизимли техник ҳамкорликни йўлга қўйиш юзасидан келгуси тадбирлар режаси белгилаб олинган.