Ўзбекистон ва Қозоғистон чегарасидаги иккита ўтказиш пункти халқаро мақомга эга бўлади

Қозоғистон Сенати Ўзбекистон билан давлат чегарасидаги ўтказиш пунктлари тўғрисидаги 2006 йилги ҳукуматлараро битимга киритилган ўзгаришларни ратификация қилди.

Янги баённомага мувофиқ, «Сирдарё—Малик» ва «Селинний—Оқ олтин» автомобил ўтказиш пунктларининг мақоми икки томонлама даражадан халқаро даражага ўзгартирилади.

Шунингдек, мазкур ўтказиш пунктлари энди фақат кундузи эмас, балки кеча-ю кундуз — 24 соатлик режимда ишлайди. Бу орқали чегарадан ўтиш жараёнини тезлаштириш ва транспорт оқимини самарали бошқариш мақсад қилинган.

Пунктлар имконияти кенгаяди

Янги тартибга кўра, «Селинний—Оқ олтин» ўтказиш пункти орқали енгил автомобиллар, бўш юк транспорт воситалари, шунингдек, катта ҳажмли ва оғир вазнли юклар ҳам ҳаракатланиши мумкин бўлади. Бу халқаро юк ташувларини ташкил этиш имкониятларини сезиларли даражада оширади.

«Сирдарё—Малик» пункти эса енгил автомобиллар ва бўш юк машиналари учун очиқ бўлади. Бироқ ушбу назорат пункти орқали тижорат мақсадида юк ва товарларни олиб ўтишга рухсат берилмайди.

Расмийлар таъкидлашича, мазкур ўзгаришлар ҳамда режалаштирилган инфратузилма янгиланиши чегарадаги юклама ва транспорт оқимини бир неча йўналишлар ўртасида мувозанатли тақсимлашга хизмат қилади.

Аввалроқ Қирғизистон ва Ўзбекистон ўртасидаги «Қадамжой», «Чашма» ва «Оққия» назорат-ўтказиш пунктлари ҳам 24 соатлик иш режимига ўтган эди.

Мазкур тартиб 2026-йил 1-октябргача амал қилади. У асосан сайёҳлик мавсумида чегарадан ўтувчи фуқаролар учун қулайлик яратишга қаратилган бўлиб, ушбу пунктлардан ҳозирча фақат Ўзбекистон ва Қирғизистон фуқаролари фойдаланиши мумкин.