Ўзбекистон венчур инвестициялар ўсишида дунёда етакчи бўлди
«Dealroom.co» рейтингига кўра, 2026 йилнинг иккинчи чорагида Ўзбекистон венчур инвестициялар ўсиш суръати бўйича дунёда биринчи ўринни эгаллади.
© Vaqt.uz | Javhar ChorshanbiyevaХалқаро таҳлил платформаси «Dealroom.co» 2026 йилнинг иккинчи чораги бўйича венчур инвестициялари ҳисоботини эълон қилди.
Унга кўра, Ўзбекистонда венчур инвестициялар ҳажми ўтган йилнинг шу даврига нисбатан 539,7 фоизга ўсган.
Бу натижа билан Ўзбекистон бир йиллик ўсиш суръати бўйича дунёда биринчи ўринни эгаллади. Кейинги ўринлардан Кения 325,7 фоиз ва Австрия 307,7 фоизлик ўсиш билан жой олган.
Рейтингга, шунингдек, Гана, Покистон, Хитой, Аргентина, Украина, Хорватия ва АҚШ ҳам кирган.
Бу нима дегани?
Мазкур рейтинг мамлакатларга кирган венчур инвестицияларининг умумий ҳажмини эмас, балки ўтган йилнинг шу даврига нисбатан қай даражада ўсганини акс эттиради.
Яъни, Ўзбекистон энг катта венчур бозорига эга давлатга айлангани эмас, балки инвестициялар ўсиш суръати энг юқори бўлган мамлакат сифатида қайд этилган.
Шу боис бу натижа маҳаллий стартап экотизими ва юқори технологияли лойиҳаларга қизиқиш кучайиб бораётганини кўрсатувчи индикатор сифатида баҳоланади.
