Ўзбекистон–Япония парламентлараро ҳамкорлиги кенгаяди
Шавкат Мирзиёев Япония парламентининг Маслаҳатчилар палатаси президенти ва Вакиллар палатаси спикери билан стратегик шерикликни мустаҳкамлаш масалаларини муҳокама қилди.
Ўзбекистон президенти Шавкат Мирзиёев Японияга расмий ташрифи доирасида мамлакат парламентининг Маслаҳатчилар палатаси президенти Масаказу Секигучи билан учрашди. Суҳбатда икки давлат ўртасидаги стратегик шериклик ва кўп қиррали ҳамкорликни ривожлантиришда парламентлар алоҳида ўрин тутиши таъкидланди.
Учрашувда Япония парламенти вакилларининг жорий йил апрел ойида Тошкентда ўтган Парламентлараро иттифоқнинг 150 йиллигига бағишланган сессияда фаол иштирок этгани алоҳида қайд этилди. Томонлар ушбу форматдаги мулоқотлар қонун ижодкорлиги ва институционал ҳамкорликни чуқурлаштиришга хизмат қилишини таъкидладилар.
Ёшлар парламент ташаббусларини қўллаб-қувватлаш масалаларига ҳам эътибор қаратилди. Хусусан, Ўзбекистон–Япония ёшлар парламентлари аъзолари форумини ўтказиш, шунингдек, 2026 йилда Самарқандда бўлиб ўтадиган Ёшлар парламентлари аъзолари глобал конференциясида Япония делегациясининг иштирокини таъминлаш муҳимлиги билдирилди.
Президент Мирзиёев Токио шаҳрида Япония парламентининг Вакиллар палатаси спикери Фукуширо Нукага билан ҳам учрашув ўтказди. Унда Ўзбекистон–Япония стратегик шериклигини янада мустаҳкамлаш, жумладан, парламентлараро ҳамкорликни кенгайтириш масалалари муҳокама қилинди.
Икки мамлакат парламент делегациялари ўртасида ўзаро ташрифлар ва учрашувлар фаол тус олгани мамнуният билан қайд этилди. Парламентлардаги дўстлик гуруҳлари самарали иш олиб бораётгани, май ойида Токиода навбатдаги парламентлараро форум муваффақиятли ўтказилгани таъкидланди. Шунингдек, парламент қўмиталари, халқ депутатлари маҳаллий кенгашлари ва Япония префектуралари ассамблеялари ўртасида ҳамкорлик ўрнатиш, рақамли технологиялар ва сунъий интеллект соҳасида қонун ижодкорлиги бўйича тажриба алмашиш муҳим экани қайд этилди.
