Ўзбекистонда 6,6 мингдан ортиқ банк картаси блокланди
2026-йилнинг биринчи чорагида 3,5 мингдан ортиқ кибержиноят фош этилди, 50 млрд сўмдан зиёд зарар қайтарилди.
© papabankir2026-йилнинг дастлабки уч ойи давомида 32 млрд сўм пулларнинг ноқонуний четга чиқиб кетиши олди олинди ҳамда 6 661 та жиноятга алоқадор банк карталари блокланди. Бу ҳақда Ички ишлар органлари фаолияти юзасидан жорий йилнинг биринчи чораги бўйича таҳлилий ҳисоботда сўз боради.
Қайд этилишича, вазирлик тизимида 2026-йил «Кибержиноятларга қарши курашиш йили» деб эълон қилиниб, аниқ ва мақсадли чора-тадбирлар белгилаб олинган. Марказий банк билан ҳамкорликда яратилган махсус тизим орқали келиб тушган ариза асосида айни вақтнинг ўзида банк картасидан ўзлаштирилган пулларини тўхтатиш (блоклаш) механизми йўлга қўйилган.
Фош этилган кибержиноятлар
2026-йилнинг ўтган 3 ойида жами 3 554 та кибержиноят фош этилган, 1 125 та жиноят ташаббус
билан аниқланган ва 5 мингдан ортиқ фуқарога етказилган 50 млрд сўмдан зиёд моддий зарар қайтарилган. Шунингдек, фуқароларнинг банк ҳисобварақларидан маблағларни ноқонуний ечиб олишга йўналтирилган 270 та «фишинг» зарарли дастурлари тўхтатилиб, 300 мингдан ортиқ фуқароларнинг қурилмалари ҳамда пул маблағлари талон-торождан ҳимояланган.
Интернет мониторинги натижасида 186 та маълумот ўрганилиб, 86 та хавфли ресурс блокланган, 856 та фирибгарликка ундовчи зарарли ҳаволалар фаолиятига чек қўйилган. Кибермаконда тақиқланган материалларни тарқатган 168 нафар шахслар маъмурий ва 97 нафар шахс жиноий жавобгарликка тортилган.
Янги тизим
«Сardblok» ахборот тизим яратилиб, унда фуқародан ариза тушиши билан шу вақтнинг ўзида ундаги банк карталаридаги пулларининг айланмасини Марказий банк билан ҳамкорликда тўхтатиш имконияти яратилган. Энг асосийси, ортиқча қоғозбозликсиз шубҳали банк карталарни дарҳол блокланишига ва вақтнинг тежалишига эришилган. Амалга оширилган ишлар натижасида 32 млрд сўмнинг ноқонуний четга чиқишининг олди олинган, 6 661 та жиноятга алоқадор дропкарта блокланган.
Зарарли дастурларни аниқлаб блоклаш тизими бўлган «Сybershild» ёрдамида 270 та «фишинг» дастури тўхтатилиб, сўнгги уч ойнинг ўзида 300 мингдан ортиқ фуқароларнинг қурилмалари ҳамда пул маблағлари талон-торождан ҳимояланган.
