Ўзбекистонда ғойиб бўлган россияликка 23 йиллик қамоқ жазоси берилди
Қўнғирот шаҳрида сирли равишда йўқолиб, кейинроқ Москвадаги тергов изоляторида топилган россиялик Георгий Пирогов Полша фойдасига жосуслик қилиш ва Украина армиясини молиялаштиришда айбланди.
Россия Федерал хавфсизлик хизмати Георгий Пирогов Москва шаҳар суди томонидан давлатга хиёнат иши бўйича 23 йилга қаттиқ режимдаги колонияга ҳукм қилинганини маълум қилди. ФХХ 37 ёшли россияликни Полша махсус хизмати билан ҳамкорлик қилганликда айблаган.
ФХХ маълумотига кўра, Пирогов 2022 йил апрелида Полшада бўлган вақтида ҳарбий разведка вакили билан мустақил равишда алоқа ўрнатган. Кейин унга Россия қурол-яроғлари, ракета мажмуалари ва бошқа махфий маълумотларни тўплаш топшириғи берилган.
Шунингдек, Россия махсус хизмати Пирогов Украина Қуролли кучлари эҳтиёжлари учун криптовалютада пул ўтказгани, ҳарбий анжомлар сотиб олгани ва уларни Полша орқали Украинага етказишни ташкил қилганини билдирган. ФХХ унинг Россияга қандай келиб қолганига аниқлик киритмаган.
У Ўзбекистонда ғойиб бўлган
Пирогов уруш бошланганидан кейин Россиядан кетиб, Грузияга кўчиб ўтган. 2024 йил ёзида хизмат сафари билан Ўзбекистонга келган, 6 июл куни эса Қўнғирот шаҳрида ғойиб бўлган. Кейин унинг автомобили шаҳардан қарийб 90 километр узоқликдаги Нукус шаҳрида топилган.
Унинг яқинлари Пирогов Ўзбекистондан Бухоро орқали Грузияга қайтишни режалаштирганини айтган. 9 июл куни унинг Москвадаги тергов изоляторида экани ва давлатга хиёнатда гумон қилинаётгани маълум бўлди. Унинг РФ ҳудудига айнан қандай бориб қолгани ҳамон номаълумлигича қолмоқда.
