Ўзбекистонда кредитлар қолдиғи 644,6 трлн сўмга етди
Етти ойда жисмоний ва юридик шахсларга ажратилган кредитлар қолдиғи йил бошидан бери 6,7 фоизга ошган. Хусусан, аҳоли кесимида микрокредитлар қолдиғи 15,5% га, ипотека кредитлари 11% га, микроқарзлар қолдиғи эса 4,7% га кўпайди.
Ўзбекистонда жисмоний ва юридик шахсларга ажратилган кредитлар қолдиғи 2026 йил бошидан буён 6,7% га ошиб, 1-август ҳолатига 644,6 трлн сўмни ташкил қилди. Бу ҳақда Марказий банк маълумотларида келтирилган.
Жисмоний шахслар кредити
2026-йил 1-январ ҳолатига жисмоний шахсларга ажратилган кредитлар қолдиғи 220,3 трлн сўм бўлган. 1 августга келиб бу кўрсаткич 239,8 трлн сўмга етган ва 8,9 фоизга ошган.
Аҳолига ажратилган кредитлар таркибида энг катта ўсиш бошқа кредитларда қайд этилган. Кредит карталари ва овердрафтларни ўз ичига олган ушбу сегмент қолдиғи 33,5 фоизга ошиб, 5,9 трлн сўмга етган.
Микрокредитлар қолдиғи 15,5 фоизга ўсиб, 46,7 трлн сўмни ташкил қилган. Ипотека кредитлари 11 фоизга ошиб, 88,1 трлн сўмга етган. Микроқарзлар 4,7 фоизга кўпайиб, 51,1 трлн сўм бўлган.
Автокредитлар қолдиғи 40,5 трлн сўмга етган. Таълим кредитларида эса 1,3 фоизлик пасайиш кузатилиб, қолдиқ 6,8 трлн сўмни ташкил қилган.
Бизнес кредитлари ҳам ошган
Юридик шахсларга ажратилган кредитлар қолдиғи 2026-йил бошидаги 383,7 трлн сўмдан 1-августга қадар 404,8 трлн сўмга етган. Ўсиш 5,5 фоизни ташкил қилган.
Кредит ташкилотлари бўлмаган юридик шахсларга ажратилган кредитлар қолдиғи 377,5 трлн сўмга етган. Бу йил бошидаги кўрсаткичдан 4,9 фоиз юқори.
Лизинг ва факторинг бўйича кредитлар 27,5 фоизга ўсиб, 4,9 трлн сўмни ташкил қилган. Микрокредитлар қолдиғи эса 22,1 фоизга ошиб, 17,9 трлн сўмга етган.
Айрим йўналишларда пасайиш бор
Банклараро кредитлар қолдиғи энг юқори ўсишлардан бирини кўрсатган. Ушбу кўрсаткич 58,2 фоизга ошиб, 1 трлн сўмдан ошган.
Шу билан бирга, синдикатлаштирилган кредитлар қолдиғи 26,1 фоизга камайиб, 3,5 трлн сўмни ташкил қилган.
Умуман, 2026 йилнинг дастлабки етти ойида кредитлар қолдиғи 40,6 трлн сўмга кўпайган. Ўсишнинг асосий қисми жисмоний шахслар кредитлари ва бизнесга ажратилган маблағлар ҳисобига тўғри келган.
Марказий банк аввалроқ йирик корхоналарнинг ярми фойдаси билан кредит фоизларини қоплай олмаётганини маълум қилганди. Регулятор таҳлилига киритилган 440 та йирик корхонанинг 51 фоизида солиқ тўлашдан олдинги фойда қарзлар бўйича фоиз харажатларини қоплашга етмаган.
