Ўзбекистонда мансабдор шахсларнинг даромади декларацияси бўйича қонун тайёрланди — ХВЖ

Халқаро валюта жамғармаси Ўзбекистонда давлат хизматчилари даромадлари ва мулкини декларация қилиш, шунингдек коррупция ҳолатларини фош этувчи информаторларни ҳимоя қилишга доир қонун лойиҳалари ишлаб чиқилганини маълум қилди. ХВЖ миссияси баёнотида қайд этилишича, манфаатлар тўқнашуви тўғрисидаги қонун қабул қилингани ва қолган икки ҳужжатнинг парламент муҳокамасига тайёрланаётгани ижобий қадам сифатида баҳоланган.

Олий Мажлис Қонунчилик палатаси матбуот хизмати Spot нашри сўровига жавобан бу қонун лойиҳалари ҳали расман киритилмаганини таъкидлади. Бу эса ҳужжатлар ҳозирча тайёргарлик босқичида эканини англатади.

ХВЖ 2024 йил май ойида ҳукуматга мансабдорлар даромадлари декларацияси ва манфаатлар тўқнашуви бўйича қонунларни тез фурсатда қабул қилишни тавсия қилган эди. Давлат раҳбари Шавкат Мирзиёев март ойидаги коррупцияга қарши миллий кенгаш йиғилишида декларация жорий қилиш вақти келганини билдирди ва бу борада жамоатчилик назорати муҳим эканини таъкидлади. У масъул идораларга қонун лойиҳасини жамоат муҳокамасига чиқариш ва 1 апрелга қадар парламентга киритиш вазифасини топширган эди.

Президент, шунингдек, ноқонуний бойиш учун жавобгарлик белгилаш зарурлигини айтган. Таклифга кўра, мансабдор шахс ўз расмий даромадига мос келмайдиган мулкка эгалиги ошкор бўлса, унинг келиб чиқиш манбасини ўзи исботлаши лозим бўлади.

Апрел ойида Ш.Мирзиёев давлат хизматчилари даромади ва мулкини декларация қилиш тўғрисидаги қонунни май охирига қадар тайёрлашни вазифа қилган, ҳужжатда декларацияларни тўлдириш тартиби ва уларни текшириш механизмлари аниқ ёритилиши кераклиги қайд этилган.

ХВЖ миссияси мамлакатда олиб борилаётган институционал ислоҳотлар ва шаффофликни оширишга қаратилган қадамларни қўллаб-қувватлашини маълум қилган.

Энди қонун лойиҳаларининг Олий Мажлис муҳокамасига киритилиши коррупцияга қарши тизимни кучайтиришда навбатдаги муҳим босқич бўлиши кутилмоқда.