Ўзбекистонликлар пулларини энг кўп қайси банкларда сақламоқда?

Марказий банк маълумотларига кўра, 2026 йил 1 май ҳолатига банклардаги жами депозитлар 444,4 трлн сўмни ташкил қилган. Шундан 170,2 трлн сўми жисмоний шахслар, 274,2 трлн сўми эса юридик шахслар маблағлари ҳиссасига тўғри келган. Шу тариқа аҳолининг банклардаги маблағлари жами депозитларнинг 38,3 фоизини ташкил этмоқда.

Аҳоли депозитлари ҳажми бўйича Капиталбанк банк тизимида етакчилик қилмоқда. Банкдаги жисмоний шахслар маблағлари 26,8 трлн сўмга етган. Бу Ўзбекистон банкларидаги барча аҳоли депозитларининг 15,8 фоизига тенг. Бошқача айтганда, банклардаги жисмоний шахсларга тегишли ҳар 100 минг сўмнинг қарийб 16 минг сўми Капиталбанкда сақланмоқда.

Иккинчи ўринни 19,1 трлн сўмлик аҳоли депозитлари билан Агробанк эгаллаган. Миллийбанк эса 18,2 трлн сўм билан учинчи ўринда турибди. Агробанк Миллийбанкни қарийб 944 млрд сўмга ортда қолдирган, Капиталбанк ва Агробанк ўртасидаги фарқ эса 7,7 трлн сўмни ташкил қилмоқда.

Фақат шу учта етакчи банкнинг ўзида жисмоний шахсларнинг 64,1 трлн сўмлик маблағи жамланган. Бу банк тизимидаги жами аҳоли депозитларининг 37,6 фоизига тенг.

Кейинги ўринларни Ўзсаноатқурилишбанк 11,6 трлн сўм, Асакабанк 9,7 трлн сўм ва Анорбанк 9,3 трлн сўмлик кўрсаткич билан эгаллаган. Ҳамкорбанкдаги аҳоли депозитлари 8,7 трлн сўмни ташкил қилиб, банк рейтингда еттинчи ўринда жойлашган.

Халқ банкида жисмоний шахсларнинг 6,3 трлн сўмлик маблағи сақланмоқда. Инфинбанкда бу кўрсаткич 6,1 трлн сўмни, TBC Bank’да 6 трлн сўмни ташкил қилган. Алоқабанк ҳам 5,99 трлн сўмлик депозит билан TBC Bank’дан атиги 53 млрд сўмга ортда қолган.

Ипак Йўли Банк ва Бизнесни ривожлантириш банкида жисмоний шахслар депозитлари мос равишда 5,4 трлн сўмни ташкил этган. Ипотека-банкда эса аҳоли маблағлари 5,1 трлн сўмга етган.

Шу тариқа, жисмоний шахслар депозитлари энг кўп жамланган банклар ўнталиги қуйидагича кўриниш олган:

Бешта етакчи банкдаги аҳоли депозитларининг умумий ҳажми 85,3 трлн сўмни ташкил қилган. Бу банк тизимидаги жами жисмоний шахслар маблағларининг 50,1 фоизига тенг. Дастлабки ўнта банкда эса 121,9 трлн сўм ёки барча аҳоли депозитларининг 71,6 фоизи жамланган.

Аҳоли депозитлари бир йилда 40 трлн сўмдан кўпроққа ошган

2025 йил 1 май ҳолатига Ўзбекистон банкларидаги жисмоний шахслар депозитлари 129,9 трлн сўмни ташкил қилган эди. Бир йил ичида бу кўрсаткич 40,3 трлн сўмга ёки 31 фоизга ошиб, 170,2 трлн сўмга етган.

Мутлақ миқдорда энг катта ўсиш Агробанкда кузатилган. Банкдаги аҳоли депозитлари бир йил ичида 10,4 трлн сўмдан 19,1 трлн сўмга етган. Ўсиш 8,7 трлн сўм ёки 84,2 фоизни ташкил қилган. Натижада Агробанк жисмоний шахслар депозитлари бўйича Миллийбанкни ортда қолдириб, иккинчи ўринга кўтарилган.

Миллийбанкдаги аҳоли маблағлари бир йилда 13,3 трлн сўмдан 18,2 трлн сўмга етиб, 4,9 трлн сўмга кўпайган. Ўзсаноатқурилишбанкда ўсиш 4,1 трлн сўмни, Капиталбанкда 3,3 трлн сўмни, Асакабанкда эса 2,3 трлн сўмни ташкил қилган.

Бизнесни ривожлантириш банкида жисмоний шахслар депозитлари 2,7 трлн сўмдан 5,4 трлн сўмга етиб, қарийб икки баравар ошган. Анорбанкда аҳоли маблағлари 1,9 трлн сўмга, Ҳамкорбанкда 1,6 трлн сўмга, Инфинбанкда эса 1,3 трлн сўмга кўпайган.

Нисбий ўсиш бўйича айрим кичик ва рақамли банкларда янада юқори кўрсаткичлар кузатилган. Жумладан, Uzum Bank’даги жисмоний шахслар депозитлари 68 млрд сўмдан 1,2 трлн сўмга, Hayot Bank’да 129 млрд сўмдан 1,8 трлн сўмга етган. Бироқ бу ҳолатда юқори ўсиш суръатига аввалги даврдаги кичик база ҳам таъсир қилган.

Айрим банкларда аҳоли маблағлари камайган

Банк тизимида умумий ўсиш кузатилганига қарамай, айрим банкларда жисмоний шахслар депозитлари қисқарган. Энг катта пасайиш Tenge Bank’да қайд этилган. Банкдаги аҳоли маблағлари 1,77 трлн сўмдан 783 млрд сўмга тушиб, қарийб 988 млрд сўмга ёки 55,8 фоизга камайган.

Ziraat Bank Uzbekistan’да жисмоний шахслар депозитлари 951 млрд сўмдан 655 млрд сўмга, Oktobank’да 650 млрд сўмдан 484 млрд сўмга тушган. KDB Bank Uzbekistan’да пасайиш 100 млрд сўмни, Orient Finans Bank’да эса 63 млрд сўмни ташкил қилган.

Аҳоли хусусий банкларда кўпроқ пул сақламоқда

Давлат улуши мавжуд банкларда жисмоний шахслар депозитлари 82,3 трлн сўмни ташкил қилган. Бошқа банкларда эса аҳолининг 87,9 трлн сўмлик маблағи сақланмоқда. Шу тариқа жисмоний шахслар депозитларининг 51,6 фоизи давлат улуши мавжуд бўлмаган банклар, 48,4 фоизи эса давлат банклари ҳиссасига тўғри келган.

Бунда Капиталбанк, Анорбанк, Ҳамкорбанк, Инфинбанк ва TBC Bank сингари хусусий банкларнинг юқори ўринларда туриши муҳим роль ўйнамоқда. Шу билан бирга, Агробанк ва Миллийбанкдаги тез ўсиш давлат банкларининг аҳоли депозитлари бозоридаги мавқеи ҳам мустаҳкамланаётганини кўрсатади.