Ўзбекистоннинг ЖЧ-2026 даги иштирокига бағишланган эсдалик тангалари чиқарилади
31,1 грамм оғирликка эга бўлган эсдалик тангалари чекланган миқдорда ишлаб чиқарилган бўлиб, улар 100 та олтин ва 1000 та кумуш тангалардан иборат.
© Фото: markaziybankМарказий банк футбол бўйича Ўзбекистон миллий терма жамоасининг “Жаҳон чемпионати - 2026”да иштирок этиши муносабати билан махсус эсдалик тангаларини муомалага чиқаради. Тарихда илк бор Жаҳон чемпионатига йўл олинишини муҳрлаш мақсадида 999,9 аслликдаги соф олтин ва кумушдан зарб этилган ушбу тангалар 18 июндан бошлаб сотувга чиқарилади.
31,1 грамм оғирликка эга бўлган эсдалик тангалари чекланган миқдорда ишлаб чиқарилган бўлиб, улар 100 та олтин ва 1000 та кумуш тангалардан иборат. Тангалар республикадаги 690 та тижорат банклари филиалларида сотувга чиқарилиши белгиланган. Бу ҳақда Марказий банкнинг расмий пресс-релизида маълум қилинди. Сотув нархлари ва банклардаги мавжудлик бўйича янгиланган маълумотлар Марказий банкнинг расмий веб-сайти ҳамда ижтимоий тармоқлардаги саҳифаларида ҳар куни эълон қилиб борилади.
«Оқ бўрилар» рамзи ва тарихий дизайн
Эсдалик тангаларининг аверс қисмида Ўзбекистон футбол ассоциацияси логотипи, классик футбол тўпи чизмаси ҳамда “Тарихий зафар. Ўзбекистон футболи жаҳон чемпионатида - 2026” ёзуви акс эттирилган. Бу элементлар миллий терма жамоанинг илк мундиал йўлланмаси ва Ўзбекистон футболи тарихидаги янги саҳифани рамзий тарзда ифодалайди.
Тангалар реверс қисмидаги бўри силуэти эса мухлислар орасида “Оқ бўрилар” номи билан танилган футболчиларимизнинг шижоати, жамоавий руҳи ва таслим бўлмас характерини ифодалайди. Ушбу рамз 26 нафар футболчи силуэтини ўзида мужассам этиб, тарихий натижа бутун жамоанинг бирдамлиги ва меҳнати билан қўлга киритилганини англатади. Шунингдек, танга дизайнида кўҳна обидаларимиз деворларидаги нақшлардан олинган миллий терма жамоа либосидаги нақшлар ҳам ўрин олган бўлиб, бу футбол, миллий ғурур ва аждодлар тарихини ягона композицияда бирлаштиради.
