Пашинян ЕОИИнинг тугаши ҳақида гапирди
Арманистон бош вазири Никол Пашинян мамлакат манфаатлари инобатга олинмаса, бу Евроосиё иқтисодий иттифоқи таназзулининг бошланиши бўлиши мумкинлигини билдирди.
Арманистон бош вазири Никол Пашинян мамлакатга тегишли айрим товарларни импорт қилишга қўйилган чекловлар юзасидан фикр билдириб, агар ЕОИИ доирасида Арманистон масаласи бўйича ечим топилмаса, бу иттифоқ таназзулининг бошланишига айланиши мумкинлигини айтди.
Пашиняннинг сўзларига кўра, у Россия президенти Владимир Путин билан мазкур масала юзасидан мулоқот ўтказган. Суҳбат давомида томонлар айрим масалалар бўйича умумий тушунчага келган.
«Энг муҳими, Арманистон ўзи учун муқобил йўлларни шакллантириш бўйича қонуний ҳуқуққа эга. Мен Россия Федерацияси президентига бу йўлни эълон қилганимизни ва ундан боришимизни айтдим», — деди Арманистон бош вазири.
«Муқобиллар бўлиши керак»
Никол Пашиняннинг таъкидлашича, Арманистон ҳар қандай масалада танлов имкониятига эга бўлиши лозим.
Унинг фикрича, мамлакатнинг ягона йўналишга боғланиб қолган даври ортда қолган. Шу билан бирга, бош вазир муқобил йўлларни қачон амалга ошириш масаласи алоҳида муҳокама этилишини қайд этди.
Европа Иттифоқи масаласи
Бош вазир Арманистоннинг Европа Иттифоқига аъзо бўлиши эҳтимоли ҳақида ҳам тўхталди.
Унинг айтишича, Европа Иттифоқи ёки ЕОИИ аъзолиги бўйича референдум ўтказишдан аввал Арманистон, камида, Европа Иттифоқига аъзолик учун расмий ариза топшириши керак.
