Пентагон сунъий интеллект гигантлари билан келишди, «Anthropic» эса четда қолди

АҚШ Мудофаа вазирлиги сунъий интеллект соҳасидаги етти компания билан уларнинг илғор технологияларини махфий тармоқларига жорий этиш бўйича келишувлар тузди. Пентагон сунъий интеллект етказиб берувчилар доирасини кенгайтиришга интилмоқда, деб тушунтиради «Reuters».

Шу билан бирга, у соҳадаги етакчилардан бири бўлган стартап – «Anthropic»ни ҳалигача эътибордан четда қолдирмоқда.

Кимлар билан келишилди?

Янги етказиб берувчилар рўйхатига «SpaceX» (унинг таркибидаги «xAI» билан), «OpenAI», «Google», «Nvidia», «Reflection» номли СИ стартапи, «Microsoft» ва «Amazon Web Services2 киритилган. «Reuters» таъкидлашича, бу компанияларнинг айримлари аллақачон Пентагон билан ишлаб келган. Энди уларнинг барчаси махфий тармоқларга интеграция қилинади ва бу ҳарбийларга сезгир маълумотлар билан ишлашда кенгроқ имкониятлар беради.

«Бу келишувлар АҚШ армиясини сунъий интеллектга таянган кучга айлантиришга қаратилган трансформацияни тезлаштиради ва ҳарбийларимизнинг барча йўналишларда қарор қабул қилишда устунлигини сақлаб қолиш қобилиятини мустаҳкамлайди», – дейилади Пентагон баёнотида.

«Anthropic» билан низо эффекти

Баёнотда «Anthropic» тилга олинмаган. Илгари компания этик сабабларга кўра ўз дастурий таъминотидан Пентагон фойдаланишини чеклаган. Шундан сўнг Пентагон уни таъминот занжири учун хавф деб баҳолаб, пудратчиларга ундан фойдаланишни тақиқлаган.

Пентагон баёнотига кўра, ҳарбийлар учун мавжуд СИ хизматлари рўйхатини кенгайтириш орқали у «битта етказиб берувчига боғланиб қолиш» хавфидан қочмоқчи. «Reuters» фикрича, бу идоранинг айрим доминант компанияларга ортиқча қарамлигини камайтиришга ишора.

«Anthropic»нинг «Claude» модели аввал махфий муҳитда қўлланилган ягона СИ воситаси бўлган. У, жумладан, Эронга қарши операцияларда ва Венесуэла етакчиси Николас Мадуро билан боғлиқ ҳолатларда ишлатилгани айтилади. Бироқ «Anthropic» бош директори Дарио Амодеи Amodei ҳукумат уларнинг технологиялари оммавий ички кузатув ёки автоном қуроллар учун ишлатилмаслигига кафолат бермаса, келишув имзоламаслигини билдирган.

«Reuters» ёзишича, «Anthropic» билан низодан кейин СИ соҳасидаги янги компаниялар ҳарбийлар махфий маълумотларга уланиш жараёнини тезлаштирганини айтмоқда, энди бу 3 ойдан кам вақт олади. Илгари эса бу жараён 18 ой ёки ундан ҳам кўпроқ вақт талаб қилар эди.