Пентагон Украинага Tomahawk ракеталарини беришга рухсат берди

АҚШ Пентагони Украинага узоқ масофага учувчи Tomahawk ракеталарини беришга рухсат берди. Бу ҳақда CNN телеканали америкалик ва европалик манбаларга таяниб хабар берди. Манбаларга кўра, АҚШ ҳарбийлари захиралар ҳолатини баҳолаганидан сўнг бундай етказиб бериш мамлакат мудофаа имкониятларига жиддий таъсир қилмаслигини аниқлаган.

Шу билан бирга, якуний қарорни президент Доналд Трамп қабул қилади. Манбаларнинг айтишича, у ҳали Украинага ракета бериш ғоясидан воз кечмаган ва зарур деб топилса, тезкор етказиб бериш режалари аллақачон тайёр ҳолда турибди. Tomahawk ракеталарининг энг узоқ парвоз масофаси 2,5 минг километргача етади.

Пентагоннинг таъкидлашича, ракеталар захираси бўйича муаммо йўқ, аммо Украинада улардан фойдаланиш учун кадрлар тайёргарлиги ва техник жойлаштириш жараёнлари бўйича бир қатор «операцион масалалар» ҳал этилиши керак. Киев улардан самарали фойдаланишдан олдин махсус ўқув ва инфратузилма масалаларини ҳал этиши лозим.

Tomahawkʼларни Украинага етказиб бериш масаласи илк бор сентябр ойида муҳокама қилинган. Украина президенти Володимир Зеленский Доналд Трамп билан ёпиқ суҳбатда бу қарор Кремлни урушни тўхтатишга мажбур қилиши мумкинлигини айтган.

7 октябр куни Трамп «қарор деярли қабул қилгани»ни маълум қилган, аммо аввал Россия президенти Владимир Путин ва Зеленский билан маслаҳатлашиш ниятида эканини қўшимча қилган.

Путин билан телефон орқали суҳбатдан сўнг Трамп АҚШ «ўз захираларини харж қилишга тайёр эмаслиги»ни айтган. Кремл вакили Юрий Ушаков эса Путин Трампни бу қарор икки давлат муносабатларига жиддий таъсир қилиши ҳақида огоҳлантирганини маълум қилган.

Шу билан бирга, CNN манбаларига кўра, Оқ уйдаги мансабдорлар Трамп бу вариантни Москвага нисбатан босим воситаси сифатида сақлаб қолаётганини таъкидлаган. Уларга кўра, АҚШ президенти исталган вақтда Украинага Tomahawk етказиб бериш ҳақида буйруқ бериши мумкин.