«Прописка» ва «загранпаспорт» учун розиликни онлайн бериш мумкин бўлади
Миграция ва персоналлаштириш соҳасида давлат хизматларидан фойдаланишда «E-Rozilik» платформасини ишга тушириш таклиф этилмоқда. У орқали учинчи шахснинг розилиги талаб қилинадиган хизматлар учун Face-ID ёки MyID ёрдамида масофадан электрон розилик расмийлаштириш мумкин бўлади.
© Ijtimoiy tarmoqlarЎзбекистон Ички ишлар вазирлиги миграция ва персоналлаштириш соҳасида электрон розилик бериш тизимини жорий этишни назарда тутувчи ҳукумат қарори лойиҳасини жамоатчилик муҳокамасига қўйди.
Лойиҳага кўра, 2026 йил 1-августдан бошқа шахснинг розилиги талаб қилинадиган давлат хизматлари учун «E-Rozilik» платформаси ишга туширилади. Фуқаролар Face-ID ёки MyID орқали шахсини масофадан тасдиқлаб, розиликни электрон шаклда расмийлаштириши мумкин бўлади.
Расмийлаштирилган электрон розилик Ўзбекистон ҳудудида қоғоз кўринишидаги розилик билан тенг юридик кучга эга бўлади.
Қандай хизматларда қўлланади?
Янги тизим орқали бир қатор давлат хизматлари учун электрон розилик бериш мумкин бўлади. Жумладан:
вояга етмаганларга хорижга чиқиш биометрик паспортини расмийлаштириш учун ота-оналари ёки васийлар (ҳомийлар)нинг розилигини олиш;
15−18 ёшдаги вояга етмаганларнинг мустақил равишда чет элга чиқишларига розилик бериш;
16 ёшга тўлмаган болаларга ID-карта расмийлаштириш учун ота-она ёки қонуний вакилининг розилигини олиш;
Ўзбекистон фуқаролари, хорижий фуқаролар ва яшаш жойи бўйича рўйхатдан ўтган чет эл фуқаролари ҳамда фуқаролиги бўлмаган шахслар номидан миграция органларига ҳужжат топшириш ва олиш бўйича розилик бериш (фуқароликка оид маълумотномалар, фуқароликни қабул қилиш ёки ундан чиқиш, таклифнома жавоби);
фуқароликдан чиқишда ота-она ва турмуш ўртоғидан розилик олиш;
фуқароликни қабул қилишда фуқаролиги бўлмаган шахснинг ота-онасидан бири ёки иккаласи ҳам чет эл фуқаролари бўлган тақдирда уларнинг розилигини олиш;
фуқаролар, хорижий фуқаролар ҳамда яшаш жойи бўйича рўйхатдан ўтган яшовчи чет эл фуқаролари ва фуқаролиги бўлмаганлар номидан ҳужжат топшириш ва олишда розилик бериш;
турган жойи ёки яшаш жойи бўйича рўйхатга қўйиш ва рўйхатдан чиқаришда уй-жой эгаси ёки манфаатдор шахсларнинг розилигини олиш;
хорижга доимий яшаш учун чиқишда ота-она ва турмуш ўртоғининг розилигини олиш;
хонадонда турган ёки яшаш жойи бўйича рўйхатда турувчи шахслар ҳақида маълумот (17-шакл) олишда уй-жой эгасининг розилигини олиш;
хусусий секторда чет эл фуқароларини вақтинча рўйхатга қўйишда уй-жой эгасининг розилигини олиш;
банк тақиқи мавжуд бўлган уй-жойга яшаш ёки турган жой бўйича рўйхатга олиш учун банк розилигини олиш ва бошқалар.
Тўлов ва амал қилиш муддати
Электрон розиликни Пасспорт-виса мобил иловаси орқали расмийлаштириш учун БҲМнинг 50 фоизи — 206 минг сўм, миграция бўлимига шахсан мурожаат қилинганда эса БҲМнинг 30 фоизи — 123,6 минг сўм йиғим ундирилиши таклиф этилган.
Розилик берувчи платформада рўйхатдан ўтиб, электрон аризани тўлдиради ва Face-ID орқали шахсини тасдиқлайди. Шундан кейин тизим электрон розиликни автоматик шакллантиради, розилик олувчи эса бу ҳақда мобил илова ёки SMS орқали хабардор қилинади.
Электрон розилик бир ой давомида амал қилади ва давлат хизмати кўрсатилгунга қадар исталган вақтда бекор қилиниши мумкин. Бироқ тўланган йиғим қайтарилмайди.
Қарор лойиҳасига мувофиқ, ИИВ платформани ишлаб чиқиш ва техник қўллаб-қувватлаш учун масъул бўлади, Адлия вазирлиги эса уни «Vakolat.uz» платформаси билан интеграция қилади.
Лойиҳа муҳокамаси 5-августга қадар давом этади.
