Путин G20 саммитига боришдан қўрқди: ЖАРда уни хатар кутмоқда
Владимир Путин ноябр ойи охирида Жанубий Африка Республикасида бўлиб ўтадиган G20 саммитида шахсан иштирок этмайди. Бу қарор Ҳаагадаги Халқаро жиноят суди чиқарган қўлга олиш ордери билан боғлиқ.
Россия президенти Владимир Путин Жанубий Африка Республикаси (ЖАР) да бўлиб ўтадиган навбатдаги «Катта йигирмалик» саммитида шахсан иштирок этмайдиган бўлди. Бу ҳақда Кремл матбуот котиби Дмитрий Песков маълум қилди. «Путин шахсан иштирок этмайди, аммо Россия саммитда муносиб даражада вакили орқали тақдим этилади», — деди у.
The Moscow Times нашрининг ёзишича, Путиннинг бу қарори кутилган ҳолат, чунки ЖАР Рим статутига қўшилган ва Халқаро жиноят суди томонидан жиноятларда айбланган шахсларни қўлга олиш мажбуриятини ўз зиммасига олган. 2023 йилда суд Путинни Украинадаги болаларни депортация қилиш билан боғлиқ ҳарбий жиноятларда айблаб, унинг қўлга олиниши ҳақида ордер чиқарган эди.
Худди шундай ҳолат ўтган йили ҳам кузатилган: Путин BRICS саммитида иштирок этиш учун ЖАРга боришдан бош тортган ва унинг ўрнига ташқи ишлар вазири Сергей Лавров борган.
Ҳозирча G20 саммитида Россия номидан ким иштирок этиши маълум қилинмаган.
Жанубий Африка ҳукумати аввалроқ Россия делегацияси иштирокини таъминлаш учун «ҳуқуқий ечим изланаётганини» айтганди, бироқ Халқаро жиноят суди ордери мамлакатни мураккаб сиёсий вазиятга солиб қўйган.
