Путин оммага кўпроқ кўрина бошлади. Кремл рейтинг учун курашмоқда

Россия президенти Владимир Путин 2026 йил апрел ва май ойларида тез-тез оммага кўриниш бера бошлади.

«Faridaily» нашри Кремл матбуот хизмати маълумотларини таҳлил қилиб, бу даврда Путин 60 та оммавий тадбирда қатнашганини маълум қилди. Таққослаш учун, йилнинг дастлабки уч ойида бундай тадбирлар сони 55 тани ташкил этган.

Нашр маълумотларига кўра, сўнгги икки ой ичида Путин хорижга ҳам сафар қилди. У Хитой ва Қозоғистонга ташриф буюрган, шунингдек, жамоатчилик вакиллари билан учрашувларда қатнашган.

Бу фаоллик Кремл Россия президентининг жамоатчилик олдидаги имижини мустаҳкамлашга ҳаракат қилаётгани ҳақидаги тахминларни кучайтирди.

Бунга сабаб сифатида расмий рейтингларда кузатилаётган пасайиш кўрсатилмоқда. «Жамоатчилик фикри» фонди (ФОМ) ва ВЦИОМ маълумотларига кўра, сўнгги ойларда Путиннинг фаолиятини қўллаб-қувватлаш даражасида пасайиш тенденцияси қайд этилган.

ВЦИОМ ҳатто сўровнома методологиясини ўзгартирган бўлса-да, бу рейтингларнинг ўсишига олиб келмаган.

Хавфсизлик

Шу билан бирга, Путин Россия ҳудудлари бўйлаб сафарларни деярли тўхтатган. Январ-май ойлари давомида у Москвадан расман фақат икки марта чиқиб, ҳар икки ҳолатда ҳам Санкт-Петербургга борган. Ўтган йилнинг шу даврида эса давлат раҳбари ҳудудларга саккиз марта ташриф буюрган.

«Faridaily» манбасининг таъкидлашича, Хитой ва Қозоғистон пойтахтларида инфратузилма жиҳатидан хавфсизликни таъминлаш Рязан ёки Кемеровога қараганда осонроқ.

Май ойи бошларида Европа давлатларидан бирининг разведка хизмати Владимир Путин суиқасддан хавотирланаётгани сабабли уни ҳимоя қилиш сезиларли даражада кучайтирилгани ҳақида хабар берган эди.

«Можем объяснить» нашри эса амалдорларга Россия президенти билан учрашувларга қўл соати тақиб келиш тақиқлангани ҳақида ёзган.

Июн ойи бошларида «Financial Times» нашри Россия махсус хизматлари Эрон олий раҳнамоси Али Хоманаий ўлдирилганидан сўнг, Россия президенти Владимир Путин ва давлатнинг бошқа олий мансабдор шахслари хавфсизлигини таъминловчи махсус кузатув тизимини бир муддатга ўчириб қўйгани ҳақида хабар берди.

Уруш ва технологиялар

Нашр манбалари Путиннинг оммавий кўриниши камайган даврда ҳам фаол ишлашда давом этганини таъкидламоқда.

Хусусан, у Украинадаги уруш қатнашчилари ва ҳалок бўлган ҳарбийларнинг оила аъзолари билан учрашувлар ўтказаётгани айтилган.

Шунингдек, Путин юқори технологиялар ва сунъий интеллект соҳасига бағишланган йиғилишларда ҳам фаол иштирок этмоқда. Бироқ бу учрашувлар мазмуни ҳақида расмий маълумотлар деярли эълон қилинмаган.