Путин Трампга Уиткоффдан совға бериб юборди
Уиткофф Путин билан музокаралардан сўнг Трампга икра олиб борган.
АҚШ махсус вакили Стив Уиткофф Трампга Россиядан келган ноодатий совға — Узоқ Шарқдан келтирилган бир қути қизил икрани топширди. Бу ҳақда "РБК" газетаси Хабаровск ўлкаси Саноат ва савдо вазирлигига таяниб хабар бермоқда.
Нашрнинг таъкидлашича, Уиткофф Россия президенти Владимир Путин билан музокаралар арафасида Москвадаги «Савва» ресторанида тушлик қилаётган пайтида икрадан татиб кўрган.
Икра Уиткоффда кучли таассурот қолдирганидан Россия томони махсус вакилга кичик совға эмас, балки бир қути икра ҳадя қилишга қарор қилган. Уиткофф эса уни АҚШга олиб бориб, шахсан Трампга топширган.
Икра Хабаровск ўлкасининг Николаевск раёнида жойлашган балиқ комбинатида ишлаб чиқарилган. Нашрнинг қайд этишича, минтақа ҳукумати ушбу гастрономик эпизодни «юмшоқ куч» элементига айлантириб, деликатеснинг Узоқ Шарқдаги заводдан Оқ уйгача бўлган йўлини оммавий равишда қайд этган.
Уиткоффнинг Москвага ташрифи анча жиддий мазмунга эга эди. Унинг Путин билан музокаралари 2 декабр куни бўлиб ўтди ва беш соатдан ортиқ давом этиб, ярим тундан кейин якунланди. Томонлар Украинадаги тинчлик режаси параметрлари ҳамда Москва ва Вашингтон ўртасидаги мулоқотнинг келгуси қадамларини муҳокама қилишган. Президент ёрдамчиси Юрий Ушаков кейинчалик бу суҳбатни фойдали, конструктив ва мазмунли деб баҳолади.
Эътиборлиси шундаки, АҚШнинг 2022 йилда Украина уруши бошланганидан кейин Россия экспортига қарши жорий этган санкциялари қизил икрани четлаб ўтган. Россия Федерацияси бошқа турдаги маҳсулотларга қўйилган чекловларга қарамай, ушбу товарни Америка бозорига етказиб беришда давом этмоқда.
