Қамчибек Ташиев давлат тўнтаришига уринишда айбланди

Қирғизистонда Миллий хавфсизлик давлат қўмитасининг собиқ раҳбари Қамчибек Ташиев давлат тўнтаришига уринишда айбланди. У билан бирга яна икки нафар собиқ юқори лавозимли амалдор ҳам айбланмоқда, деб хабар беради «24.kg».

Гап Қамчибек Ташиев, собиқ депутат Қурманкул Зулушев ва парламентнинг собиқ спикери Нурланбек Тургунбек уулу ҳақида бормоқда. Уларнинг адвокати Шердор Абдукапаровнинг маълум қилишича, қўйилган айблов моддалари бу иш бўйича аввал айбланган бошқа шахсларга нисбатан қўлланган моддаларга ўхшаш. Уларнинг учаласи ИИВ Бош тергов бошқармасида сўроқ қилинган, у ерда бир неча соат бўлганидан сўнг бинодан чиқиб кетган. Расмий идоралар ҳозирча иш тафсилотларини ошкор қилмаяпти.

«75 мактуб»

Манбаларга кўра, тергов «75 мактуб» деб аталган мурожаат билан боғлиқ, унда бир гуруҳ фуқаролар президент Садир Жапаровга муддатидан олдин сайлов ўтказишга чақириқ билан мурожаат қилган. Ушбу мактуб феврал ойида пайдо бўлганидан кейин мамлакатда кадрлар ўзгаришлари юз берган: қатор амалдорлар лавозимидан озод этилган, айрим депутатлар, жумладан, ушбу иш фигурантлари ҳам мандатларини топширган. Кейинчалик жиноят иши қўзғатилган ва имзо чекканларнинг бир қисми ҳозир ҳибсхонада сақланмоқда.

Аввалроқ Қирғизистон президенти Садыр Жапаров интервюсида «75 мактуб»нинг пайдо бўлишидан тортиб парламентда муҳокама қилинишигача бўлган жараённи кузатиб борганини айтган. Ҳужжатни пленар мажлисга олиб чиқиш режалаштирилганда, ҳокимият тезкор равишда аралашиб, чоралар кўрган.

Қирғизистонда навбатдаги президент сайловлари 2027-йил январ ойида бўлиб ўтади.