Қирғизистон яна еврооблигациялар бозорига чиқиши мумкин

Қирғизистон жорий йилнинг ўзида халқаро еврооблигациялар бозорига яна чиқиши мумкин. Бу ҳақда Молия вазири Руслан Сўйналиев 24.kg саволига жавобан маълум қилди.

«Агар зарурат бўлса, яна чиқарамиз», – деди у.

2025-йилда Қирғизистон илк бор халқаро бозорда 700 млн долларлик еврооблигацияларни жойлаштирган эди.
Руслан Сўйналиевнинг сўзларига кўра, евробондлар чиқарилиши мамлакат имижини мустаҳкамлаш ва халқаро молия бозорлари ишончини ошириш йўлида муҳим қадам бўлган.

«Қўшни давлатлар бу йўналишда анча аввал иш бошлаган. Еврооблигациялар айнан иқтисодиётимизни ривожлантириш учун ишлатилади», – деди у.

Еврооблигациялар афзалликлари

Унинг таъкидлашича, еврооблигацияларнинг асосий афзалликларидан бири донорлар томонидан қўшимча шартлар қўйилмасдан маблағ жалб қилиш имкониятидир.

«Донорлар таклиф қиладиган дастурлар ҳар доим ҳам давлат учун фойдали эмас. Баъзан қонунчиликни ўзгартиришимиз ёки тарифларни оширишимизга тўғри келади. Яхши шартли кредитлар ҳам бор, аммо ҳаммаси ҳам мақбул эмас», – дея тушунтирди вазир.

Молия вазири сўзларига кўра, евробондлар Қирғизистонга жалб қилинган маблағларни мустақил равишда бошқариш имконини беради.

«Евробондлар – ҳеч қандай мажбуриятларсиз. Ҳа, уларнинг фоизлари қимматроқ, лекин бу шартларни юмшатадиган механизмлар мавжуд», – деди Руслан Сўйналиев.

Унинг айтишича, хатарларни камайтириш мақсадида ҳукумат давлат қарзини юмшатиш бўйича махсус ҳисобрақам ташкил қилган.

«Агар бу давлат қарзига тушса, у бюджет учун юк бўлмаслиги керак», – дея таъкидлади Сўйналиев.