Қозоғистонда 2 минг ва 10 минг тенгелик эски банкноталар муомаладан чиқарилмоқда
Жорий йил охиригача Қозоғистонда «Сақ услуби» сериясидаги янги 20 000 тенгелик банкнота чиқарилиши режалаштирилмоқда. Шу билан бирга, эски купюраларни алмаштириш муддатлари ҳам эълон қилинди.
© pixabay.comЖорий йилда 2000 ва 10 000 тенгелик эски намунадаги банкноталарнинг параллел муомала даври якунланади. Шу билан бирга, «Сақ услуби» сериясидаги 20 000 тенгелик сўнгги янги банкнотани йил охирида чиқариш режалаштирилмоқда. Бу ҳақда Қозоғистон Миллий банки маълум қилди.
Миллий банк эслатишича, янги банкноталар муомалага чиқарилганда эски ва янги купюраларнинг параллел муомала даври жорий этилади. Бу вақт мобайнида аҳоли мазкур банкноталар орқали бемалол тўлов қилиши ва уларни янгисига алмаштириши мумкин. Шу даврда банклар банкоматлар ва касса ускуналарини мослаштиради.
«Қазақ Елi» тасвирланган купюралар
Тақдим этилган маълумотларга кўра, 2026-йилда 2000 ва 10 000 тенгелик банкноталар учун параллел муомала даври тугайди. Гап 2012-йил намунасидаги, «Қазақ Елi» монументи тасвирланган купюралар ҳақида кетмоқда:
— 10 000 тенге — 2024-йил 28-июндан 2026-йил 27-июнгача;
— 2 000 тенге — 2024-йил 25-декабрдан 2026-йил 24-июнгача.
Миллий банкда қўшимча қилишларича, 10 000 тенгелик купюралар аҳоли ва тадбиркорлар орасида энг кенг тарқалгани сабабли, улар учун муддатни узайтириш варианти ҳам кўриб чиқилмоқда.
Шу билан бирга, бундай купюраларни 2029-йил 25-июнгача тижорат банклари ва «Kazpost» бўлимларида алмаштириш мумкин. Қозоғистон Миллий банки филиалларида эса алмаштириш муддатсиз амалга оширилади.
