Қозоғистонга иккита янги халқаро авиақатнов йўлга қўйилади
Ўзбекистон ва Арманистон авиакомпаниялари Қозоғистон билан янги тўғридан-тўғри авиақатновларни бошламоқда. Янги рейслар Қостанай, Тошкент, Олмаота ва Ереван шаҳарларини боғлайди.
Қозоғистон халқаро авиақатновлар географиясини кенгайтиришда давом этмоқда. Мамлакат Транспорт вазирлиги маълумотига кўра, яқин кунларда Ўзбекистон ва Арманистон авиакомпаниялари иштирокида икки янги халқаро йўналиш ишга туширилади.
Тошкент — Қостанай йўналиши
13 июндан бошлаб Ўзбекистоннинг «Centrum Air» авиакомпанияси Тошкент — Қостанай йўналиши бўйича мунтазам рейсларни амалга оширади. Парвозлар ҳар ҳафта шанба кунлари Airbus A320 самолётида бажарилиши режалаштирилган.
Янги йўналиш Ўзбекистон ва Қозоғистоннинг шимолий ҳудудлари ўртасидаги транспорт алоқаларини мустаҳкамлаши, шунингдек ишбилармонлик ва сайёҳлик сафарларини енгиллаштириши кутилмоқда.
Ереван — Олмаота йўналиши
Шунингдек, 12 июн куни Арманистоннинг «FlyOne Armenia» авиакомпанияси Ереван — Олмаота йўналиши бўйича илк рейсини амалга оширди. Тўғридан-тўғри мунтазам парвозлар ҳафтасига икки марта — душанба ва жума кунлари бажарилади.
Қозоғистон Транспорт вазирлиги маълум қилишича, мазкур рейслар ишга туширилиши орқали Қозоғистон ва Арманистон ўртасидаги ҳафталик авиақатновлар сони 3 тадан 5 тагача ошади.
Қозоғистон ва Арманистон ўртасидаги илк тўғридан-тўғри рейслар жорий йил апрел ойида очилган эди. Ўшанда «SCAT Airlines» Ақтау — Ереван йўналишини ишга туширган бўлса, «Shirak Avia» Астанадан Ереванга мунтазам парвозларни бошлаган.
Янги рейслар Марказий Осиё ва Кавказ минтақалари ўртасидаги транспорт боғлиқлигини кучайтириш ҳамда ҳаво қатновлари бозорида рақобатни оширишга хизмат қилиши кутилмоқда.
