Россия аэропортларида 400 га яқин рейс бекор қилинди ёки кечиктирилди

Москванинг Шереметево аэропортида 171 та рейс бекор қилинган, 56 та рейс эса икки соатдан кўпроқ вақтга кечиктирилган. Санкт-Петербургнинг Пулково аэропортида 90 та рейс бекор қилиниб, 37 та рейс кечиктирилган. Нижний Новгороддаги Чкалов аэропортида 26 та рейс бекор қилиниб, 13 та рейс кечиктирилган. Росавиацияга кўра, энг узоқ чекловлар айнан шу аэропортда кузатилган. Иваново, Калуга, Псков, Тамбов ва Ярославл шаҳарларидаги аэропортлар ҳам вақтинча парвозларга хизмат кўрсатмаган. Россия Транспорт вазирлиги ва Росавиация бу чоралар парвоз хавфсизлигини таъминлаш мақсадида кўрилганини маълум қилди. 5 июл куни ҳам Россиядаги учта йирик аэропортда 250 дан ортиқ рейс бекор қилинган ва 270 дан зиёд рейс кечиктирилган. Экспертларнинг баҳолашича, икки кунлик парвоз муаммолари Россия авиакомпанияларига тахминан 20 млрд рубл зарар келтириши мумкин. Россия Мудофаа вазирлиги маълумотига кўра, 6 июл куни мамлакатнинг саккизта ҳудуди устида 48 та дрон Россия ҳаво мудофаа тизимлари томонидан йўқ қилинган. Энг кўп дрон Калуга ва Брянск вилоятларида уриб туширилган.