Россия атом электр станциясига зарар етганини маълум қилди

Росатом бош директори Алексей Лихачев Калининградда АЭХА бош директори Рафаэл Гроссига 12 ноябрдан 13 ноябрга ўтар кечаси Нововоронеж атом электр станциясига дронлар томонидан ҳужум қилингани ҳақида маълум қилди.  

Россия томонига кўра, саккизта дрон уриб туширилган, бироқ уларнинг қолдиқлари станциянинг асосий ўтказгич қурилмасига зарар етказган. Лихачевнинг сўзларига кўра, бу учта энергоблокнинг тармоқдан узилишига ва уларнинг қуввати 50 фоиздан камайишига олиб келган. 

Лихачевнинг таъкидлашича, Россия ўз ядровий объектларига қилинган ҳужумларга адекват жавоб бера олади. Унинг хабар беришича, 13 ноябр куни таъмирдан кейин станция тўлиқ тикланган. 

Воронеж области губернатори Александр Гусевнинг маълум қилишича, станциядаги радиация даражаси ўзгармаган ва табиий даражага мос келади. Унинг қўшимча қилишича, битта энергоблок тўлиқ қувват билан ишлашда давом этган. 

Лихачев Гроссининг Калининградга ташрифи арафасида Россия томони АЭХА билан Запорижжя атом электр станцияси хавфсизлиги ва ядровий ҳодисанинг олдини олиш бўйича мумкин бўлган қўшма чораларни муҳокама қилишни режалаштирганини таъкидлади. 

В. А. Сидоренко номидаги Нововоронеж атом электр станцияси Воронеждан 45 км жанубда, Дон дарёси соҳилида жойлашган. Завод 1964 йилдан бери ишлайди ва ВВЕР реакторлари бўлган эттита қувват блокини ўз ичига олади. 

Росенергоатом маълумотларига кўра, заводга аввалги дрон ҳужуми 7 октабр куни содир бўлган. Уриб туширилган дрон совутиш минорасига қулаб тушган ва зарба пайтида портлаган. Россия томони қурбонлар ва жабрланганлар йўқлигини маълум қилди. Заводнинг ишлаши ва радиация даражаси ўзгаришсиз қолди.