Россия дизель экспортига тақиқ қўйди
Тақиқ июль охиригача давом этади.
© altkres.ruРоссия ҳукумати 8-июлдан бошлаб дизель ёқилғиси экспортини тақиқлади. Бу ҳақда бош вазир ўринбосари Александр Новак президент Владимир Путин раислигида бўлиб ўтган ҳукумат йиғилишида маълум қилди.
Ҳукумат дизель ёқилғиси, денгиз ёқилғиси ва газ мойи экспортига вақтинчалик тақиқ 31-июлгача амал қилишини ва энди нефть маҳсулотлари ишлаб чиқарувчиларга нисбатан қўлланилишини таъкидлади.
«Қарор ички ёқилғи бозорида барқарорликни сақлаб қолиш учун қабул қилинди. Бироқ, чекловлар Россиядан халқаро ҳукуматлараро келишувлар асосида экспорт қилинадиган дизель ёқилғисига тааллуқли бўлмайди», — деб тушунтирди ҳукумат.
Новак шунингдек, президентга ички ёқилғи билан боғлиқ вазият «қийинлигича» қолаётгани, ёқилғига талаб учдан бир қисмга ошганини маълум қилди. Бош вазир ўринбосари Россия июль ойида нефть маҳсулотларини импорт қилишни бошлашини ва иқтисодий шароитларни таъминлаш учун темирйўл тарифларига чегирмалар бериш имконияти ўрганиб чиқилганини қўшимча қилди.
«Июль ойида биз нефть маҳсулотларини импорт қилишни ва паст экологик тоифадаги нефть маҳсулотларини қўшиш орқали ишлаб чиқариш ҳажмини оширишни бошлаймиз. Биз импорт қилинган нефть маҳсулотлари ва қўшимчаларга ноль божни яна бир йилга узайтирдик. Шунингдек, биз Россия темирйўллари билан импорт қилинган ёқилғи учун иқтисодий шароитларни таъминлаш мақсадида темирйўл тарифларига чегирмалар таклиф қилиш имкониятини муҳокама қилдик», — деди Новак.
Бош вазир ўринбосари, шунингдек, президентга ҳукумат бир нечта нефтни қайта ишлаш заводларини таъмирлаш лойиҳаларини кейинга қолдирганини маълум қилди.
Унинг таъкидлашича, йирик нефть компаниялари ҳудудларга ёқилғи етказиб беришни бошлаган, асосан мустақил ёқилғи қуйиш шохобчаларига эга компанияларга устувор аҳамият берилган. Апрель ойида Россия ҳукумати бензин экспортига эмбарго жорий қилди, бу эмбарго июль охиригача амал қилади. Шунингдек, 2026-йил 1-июндан 30-ноябргача Россиядан авиакеросин экспортига вақтинчалик тақиқ амал қилади.
Эслатиб ўтамиз, Россияда бензин таъминоти билан боғлиқ муаммолар Марказий Осиё мамлакатларида ҳам сезила бошлади. Қолаверса, Қозоғистондан арзон бензин ташишга йўл ёпилмоқда: энди чегарадан кунига фақат бир марта ўтиш мумкин.
