Россия Эрон урушидан ютмоқда: кунига 150 млн доллар қўшимча фойда
Яқин Шарқдаги қонли тўқнашувлар туфайли нефт нархининг кўтарилиши Россия хазинасига ҳар куни камида 110-160 млн доллар қўшимча даромад келтирмоқда.
«Financial Times» нашрининг соҳа таҳлилчилари маълумотларига таяниб хабар беришича, урушнинг илк 12 кунида Россия номинал равишда 1,3–1,9 млрд доллар ишлаб олди. Агар март ойида ўртача нарх 70–80 доллар атрофида сақланиб қолса, қўшимча даромад 4,9 млрд долларгача етиши мумкин. «Kpler» таҳлилчиси Сумит Ритолиянинг фикрича, Россия ушбу низонинг «асосий ғолиби»га айланди.
Ҳиндистон ва Хитой «жанги»
АҚШ Ҳиндистонга Россия нефтини сотиб олиш бўйича вақтинчалик рухсат бергач, ҳинд нефтни қайта ишлаш компаниялари атиги беш кунда 30 млн барреллик шартнома имзоладилар. Бу феврал ойидаги жами кўрсаткичга тенг.
Ҳиндистон: Етказиб бериш ҳажми кунига 2 млн баррелгача чиқиши кутилмоқда.
Хитой: Уруш бошлангандан бери Хитой ва Ҳиндистон импорти ҳар ҳафта 22 фоизга ошиб бормоқда.
Рақобат: Эксперт Сергей Вакуленконинг сўзларига кўра, инқироз давом этса, икки гигант давлат Россия нефти учун ўзаро курашади. Ҳозирда Ҳиндистон «Brent» нархидан ҳам 5 доллар қимматроқ тўлашга тайёр.
Санкциялар «ўлди»
Брукингс институти эксперти Робин Брукснинг ёзишича, «Urals» нефтининг нархи 85 долларга етган. Бу эса Европа Иттифоқи санкцияларининг 20-пакетидаги чекловларни амалда йўққа чиқарди. Нефт нархининг ҳар 10 долларга ошиши Россия бюджетига кунига қўшимча 54 млн доллар солиқ тушумини кафолатлайди.
Ишлаб чиқариш истиқболлари
Феврал ойида Россия қазиб олишни кунига 8,55 млн баррелгача қисқартиришга мажбур бўлган ва даромадлар Украинадаги уруш бошлангандан бери энг паст даражага (9,5 млрд доллар) тушиб кетган эди. Бироқ «Emerging Markets Oil and Gas Consulting Partners» асосчиси Роналд Смитнинг ҳисоблашича, инқироз чўзилса, Россия яқин ойларда ўз қувватларини яна 400 минг баррелга ошириши мумкин.
