Rossiya Eron urushidan yutmoqda: kuniga 150 mln dollar qo‘shimcha foyda
Yaqin Sharqdagi qonli to‘qnashuvlar tufayli neft narxining ko‘tarilishi Rossiya xazinasiga har kuni kamida 110-160 mln dollar qo‘shimcha daromad keltirmoqda.
«Financial Times» nashrining soha tahlilchilari ma’lumotlariga tayanib xabar berishicha, urushning ilk 12 kunida Rossiya nominal ravishda 1,3–1,9 mlrd dollar ishlab oldi. Agar mart oyida o‘rtacha narx 70–80 dollar atrofida saqlanib qolsa, qo‘shimcha daromad 4,9 mlrd dollargacha yetishi mumkin. «Kpler» tahlilchisi Sumit Ritoliyaning fikricha, Rossiya ushbu nizoning «asosiy g‘olibi»ga aylandi.
Hindiston va Xitoy «jangi»
AQSH Hindistonga Rossiya neftini sotib olish bo‘yicha vaqtinchalik ruxsat bergach, hind neftni qayta ishlash kompaniyalari atigi besh kunda 30 mln barrellik shartnoma imzoladilar. Bu fevral oyidagi jami ko‘rsatkichga teng.
Hindiston: Yetkazib berish hajmi kuniga 2 mln barrelgacha chiqishi kutilmoqda.
Xitoy: Urush boshlangandan beri Xitoy va Hindiston importi har hafta 22 foizga oshib bormoqda.
Raqobat: Ekspert Sergey Vakulenkoning so‘zlariga ko‘ra, inqiroz davom etsa, ikki gigant davlat Rossiya nefti uchun o‘zaro kurashadi. Hozirda Hindiston «Brent» narxidan ham 5 dollar qimmatroq to‘lashga tayyor.
Sanksiyalar «o‘ldi»
Brukings instituti eksperti Robin Bruksning yozishicha, «Urals» neftining narxi 85 dollarga yetgan. Bu esa Yevropa Ittifoqi sanksiyalarining 20-paketidagi cheklovlarni amalda yo‘qqa chiqardi. Neft narxining har 10 dollarga oshishi Rossiya budjetiga kuniga qo‘shimcha 54 mln dollar soliq tushumini kafolatlaydi.
Ishlab chiqarish istiqbollari
Fevral oyida Rossiya qazib olishni kuniga 8,55 mln barrelgacha qisqartirishga majbur bo‘lgan va daromadlar Ukrainadagi urush boshlangandan beri eng past darajaga (9,5 mlrd dollar) tushib ketgan edi. Biroq «Emerging Markets Oil and Gas Consulting Partners» asoschisi Ronald Smitning hisoblashicha, inqiroz cho‘zilsa, Rossiya yaqin oylarda o‘z quvvatlarini yana 400 ming barrelga oshirishi mumkin.
