Россия Илон Маскни сиёсий бошпана билан таъминлашга тайёр
Илон Маск ва Доналд Трамп ўртасидаги кескин низодан сўнг, Россия Давлат Думасида миллиардерга сиёсий бошпана таклиф қилишга тайёр эканини билдиришди.
Россия Давлат Думаси Халқаро ишлар қўмитаси раиси биринчи ўринбосари Дмитрий Новиков ТАСС агентлигига маълум қилди.
Новиковнинг сўзларига кўра, Маск сиёсий бошпанани талаб қилмайди, аммо зарурат туғилса, Россия унга бундай имкониятни яратиши мумкин. Депутат Маск ва Трамп ўртасидаги зиддият демократларга автоматик кўмак сифатида баҳоланмаслигини ҳам қўшимча қилди.
Икки миллиардер ўртасидаги очиқ тортишув Маск Трампнинг солиқ имтиёзларини узайтиришга қаратилган қонун лойиҳасини танқид қилганидан сўнг бошланди. Маск уни «жирканч» деб атади. Экономистлар фикрича, бу қонун АҚШ бюджети камомадини 600 млрд долларга ошириши мумкин.
Трамп Маскнинг танқидларига жавобан, давлат субсидиялари ва ҳукумат шартномаларини тўхтатиш билан таҳдид қилди. Бунга жавобан Маск Трампни «Эпштейн иши»да иштирок этишда айблади ва бу материаллар нима учун оммага ошкор қилинмаганини тушунтирди. Трамп эса Маскни «руҳий носоғлом» деб атади.
Баҳс сиёсий майдонга ҳам чиқди. Маск вице-президент Жей Ди Вэнсни Трамп ўрнига қўйишни қўллаб-қувватлади ҳамда импичмент ташаббусини маъқуллади. Унинг маслаҳатчисига кўра, Маск республикачиларни сайловларда мағлуб қилиш ва демократларга молиявий кўмак бериш ниятида.
Bloomberg маълумотларига кўра, тортишув ортидан Маск 34 млрд доллар йўқотган бўлса-да, 335 млрд долларлик бойлик билан дунёдаги энг бой инсон бўлиб қолмоқда. Tesla акциялари бир кунда 14,26 фоизга арзонлашди ва компания капитализацияси 150 млрд долларга камайди.
Politico маълум қилишича, АҚШ президенти ва Маск ўртасида телефон орқали музокара ўтказиш имконияти кўриб чиқилмоқда.
