Россия ТИВ хорижликларни зудлик билан Киевни тарк этишга чақирди

Россия Ташқи ишлар вазирлиги чет эл фуқароларини Украина пойтахти Киевни тарк этишга, шаҳар аҳолисини эса ҳарбий ва маъмурий объектлардан узоқроқ юришга чақирди. Бу ҳақда вазирликнинг матбуот хизмати баёнот эълон қилди.

ТИВ баёнотига кўра, Россия қуролли кучлари Киевдаги Украина ҳарбий-саноат мажмуаси корхоналарига тизимли зарбалар беришга киришмоқда. Гап биринчи навбатда дронлар ишлаб чиқариладиган ва уларни жангга тайёрлайдиган марказлар ҳақида бормоқда.

Вазирликнинг таъкидлашича, бу жараёнда НАТО мутахассислари Украинага эҳтиёт қисмлар етказиб бериш, разведка маълумотларини тақдим этиш ва нишонни белгилашда бевосита кўмаклашиб келмоқда.

«Зарбалар қарор қабул қилиш марказларига ҳам, қўмондонлик пунктларига ҳам берилади», — дея таъкидланади ТИВ хабарида.

Старобелскдаги воқеа

Ташқи сиёсат идораси мазкур кескин чораларни 22 майга ўтар кечаси Украина қуролли кучлари дронларининг Старобелскдаги Луганск давлат педагогика университетининг ўқув биноси ва ётоқхонасига уюштирган ҳужумига боғламоқда.

Ушбу ҳужум оқибатида 21 киши ҳалок бўлиб, 63 киши турли даражада жароҳатланган эди. ТИВ бунинг учун жавобгарликни тўлиқ Украина томонига юклаб, халқаро ҳуқуқ нормалари қўпол равишда бузилганини қайд этган.